India chhim lam, Karnataka-ah chuan khawlai leh dai hnaia vak chhuak thin keite man tumin sorkarin beihpui a thlak mek a, thla khat dawn an beih hnuah pawh an la hlawhtling thei rih lo.
Keite hi August 5 khan Karnataka hmar lama mihring cheng tamna, Belgaum khawpuiah mi pakhat a seh a, heta tang hian hriat niin a mi seh hi hliam na hle mah se a thi lo.
Hemi hnuah hian vawi eng emaw zat khawpuia golf course velah hmuh a ni leh tawh a, mi chengte an ralti hle.
State forest department chuan mi 300 velin mana ramhnuaia chhuah tumin beihpui an thlak mek a, an zingah hian veterinarian leh silai kap thiam, tihmutna hmanga kap thei turte pawh an tel.
Politics-a inbeih nan pawh nasa taka hman a ni a, eptute chuan state forest minister, Umesh Katti chu bâng turin an ti a, ani erawh chuan an duh angin keite man tuma beiin hna a thawk tih a sawi thung a. Karnataka hi BJP rorelna hmun a ni.
Karnataka hi ramngaw zau tak nei niin wildlife sanctuary pawh a ngah a, keite pawh 1,783 awmin India-a a ngah ber dawttu an ni a. An state-ah hian ramsa hi khawpui lian dang – Bangalore, Mysore leh hmun dangah pawh hmuh an ni fo thin.
Beihpui an thlaka kaihruaitu, Belgaum forest thuneitu, Anthony S Mariappa chuan Belgaum bikah hian keite an vawi khat hmuhna a ni a, hei vang hian mipui pawh an chiai niin a sawi.
Man tuma an beihnaah hian camera trap pawh 20 dahin thira siam bawm lian 10 an hung a, hetah hian a chaw chah atan ui leh vawk sate pawh an dah tel.
An state-a forest hotu lian ber, Vijayakumar Gogi chuan, “Keite hi khaw lumah a nu zin leh a rim an hriatin an pan thin a, bawmah pawh hian a luh theih nan chutiang chu kan dah,” a ti bawk.
Mi 300 chuang hian an hmuhna lai hectare 300 vela zau chu vawi thum an tuam chhuak tawh a. Sai fing pahnih ruaiin an dap bakah JCB excavator pawh paruk ngawt an inchhawp a. Hei mai a ni lo va, drone-in chung lam atangin an veh reng bawk.
Beihpui an thlak hnuah hian vawi hnih chu an hmu tawh a; mahse, an hloh leh a. Ruah sur nasain chet lak a tiharsa hle bawk niin thuneitute chuan an sawi.