Manchester United chuan an manager thar Erik ten Hag hnuaiah a zawna vawi thum nan hnehna an chang a. Season bul an tan that loh avanga buai tak Leicester City manganna belhchhah turin 1-0 in an chak.
King Power Stadium-ah United tan English forward Jadon Sancho chuan minute 23-naah goal awmchhun a khung a. United in counter-attack ah rang tak leh awmze nei a ball an inpek atangin goal an khung.
Inkhel pumpuiah mikhual team in hun tam zawk an thunun a, Leicester City lakah harsatna lian an nei lo. Brendan Rodgers-a pawlte hi league a la chak miah lo an ni a. James Maddison-a freekick pet tha tak David de Gea in a save sak bak hlauhawm mumal an nei lem lo.
United hian Liverpool leh Southampton an hneh hnuah a zawna vawi thum nan hnehna an chang a. Kum 2021 April thla hnua a zawna vawi thum inkhela an chak leh hmasak ber a ni.
Manager Ten Hag chuan, “Hmasawnna pen khat dang leh a ni a, thil lawmawm a ni. Zaninah chak turin team anga kan tanrualna kan lantir a, khelmual chhungah khan player 11, an teammate te tana theihtawp chhuah theuh kan hmu. Kan goal pawh team goal tha tak a ni a, hmasawnna tur erawh a la tam hle. Hei hi season kan hmang chho tan chiah a, thil mak erawh a ni lo.” tiin an inkhelh zawhah a thlirlet.