Zirtawpni zing dar 3:30-ah nipui football bazar chu Europe a hmun tam zawkah khar a ni a. Premier League club ten tun season-ah team intihchak nan pawisa hmang tam record an siam a. Pound tluklehdingawn 1.9 an hmang.
Kum 2017 khan Pound maktaduai 1.4 hmangin Premier League club-te hian record an siam tawh a. Europe ram dangte nen an inthlau hle.
Covid 19 hripui in a nghawng avangin kum hnih chhung club te sum hman nasa takin a tlahniam. Nimahsela kuminah erawh an sum dinhmunin a zir leh tawh avangin club-te an che na a. Club 20 zinga pakua in Pound maktaduai 100 chuang an hmang a. Manchester United in bazar inkhar ni a Pound maktaduai 82 a Antony lakluhna an ti fel chu a tawp ni a player in leina awm tawh zinga la tam ber a ni.
Chiang zawkin
Financial services firm Deloitte chuan tun nipuiah Europe a league lian panga ten a belhkhawmin Pound tluklehdingawn 3.88 an hmang a. Kum hmasa lam aiin 52% in a pung.
Premier League club te sum hman a sang zual a – La Liga, Serie A leh Bundesliga a club te sum hman belhkhawm aiin an hmang hnem zawk.
Chelsea chu Premier League chanchin a transfer window vawikhat a pawisa hmang hnem ber an ni a. Nottingham Forest chu British club zinga bazar hun vawikhat a player lalut hnem ber an ni.
A tawp ni a che langsar te
Bazar khar ni a in lei manto ber ni turin Manchester United in Brazil winger Antony an lakluhna an tifel a. Pound maktaduai 82 in an lalut.
Kum 22 mi insawnna tur hi kar tir lama chiang tawh a ni a. Kum 2027 thleng a club tharah hian contract a ziak a, kum khat ziah belh theihna a awm.
United hian ani bakah Newcastle goalkeeper Martin Dubravka chu loan in an hawh a. Pound maktaduai 2 loan fee-ah an chawi anga, a inkhelh tam dan a zirin Pound maktaduai 6 in an lei nghet ang.
Player insawn langsar dang zingah Liverpool in Juventus midfielder Arthur Melo chu loan in season tluan atan an hawh a. Reds in hliam avanga midfield a an buaina chingfel tu a nih theih an beisei.
Kum 26 mi Brazil international hian season liamta khan Juventus tan vawi 31 khel mahse tun season-ah a la inkhel lova. Reds in Pound maktaduai 3.9 in an hawh anga, Pound maktaduai 32.4 in an lei nghet thei ang.
A tawp ni ah squad intihchak nasat an ngai tih an manager berin a sawi hnuah Chelsea an che a. Striker Pierre-Emerick Aubameyang leh Juventus midfielder Denis Zakaria te an lalut.
Kum 33 mi Gabon striker hi Pound maktaduai 10.3 in an lalut a. February thla a Spain a pan hnuah England-ah a kir lehnghal.
Kum 25 mi Switzerland international Zakaria hi loan in an hawh a, lei ngheh theihna an nei.