- RINFELA ZADENG
Alvin L. Reid, Southeastern Baptist Theological Seminary, Wake Forest, North Carolina-a Chanchin Tha hril lama zirtirtu hna thawk chuan, “Kum Zabi pakhatna velah kha chuanin Rom khawpui kalkawng khan Chanchin Tha hi an keng ber a, vawiinah erawh chuan infiamna hian Chanchin Tha thehdarhna hmanrua ber a ni tawh,” tiin a sawi a, a pawmawm hle. Infiamna hian tunlai khawvelah hmun laili ber a chang a; infiamna hmanga Chanchin Tha hril pawimawhzia hi kan thiam tawk tlemte hmangin kan sawi ang.
Infiamna khawvel
Khawvela hnam tin chi tin hian infiamna hi kan ngaihlu tawlh tawlh a; ram ropui leh thiltithei, Sorkar chak tehna hmanraw pawimawh ber pakhatah kan hmang tawh a ni tih kan hre vek awm e. Khawvela ennawm ropui bera kan ngaih pawh eng dang ni loin, infiamna huang chhunga mi ‘FIFA World Cup’ a ni tih kan hre theuh a. Infiamna ngaina lo leh en ngai miah lo pawhin FIFA World Cup hi chu kan en deuh vek a nih hi. Chuvangin vawiin hi Infiamna khawvel a ni a, chanchinthar luahtu ber pawh infiamna hi a ni.
Mizote leh Infiamna
India rama Mizo te kan hming thatna leh hmingthanna ber chu infiamna hi a ni tih kan hre vek a. Tun hma deuh atangin vawiin thlengin India leh khawvel hriatah Mizoram leh Mizote hi khawvelin min hre chho mek a, a lawmawm takzet. Thal kah atanga bul tanin Jeremy Lalrinnunga’n bung thar min kaipuiin rit min chawisak a, Lalremsiami chuan Hockey hmangin khawvelah min pho chhuak a, Tennis lamah pawh Lalrinpuia kan nei a. Football lamah phei chuan sawisen loh khawpin Mizote’n hma kan sawn a; Malsawmtluanga, Jeje Lalpekhlua, Lalrindika Ralte, Lallianzuala Chhangte leh mi dangte kan nei a, kan nei zel bawk ang a; Pathian malsawmna ropui tak a ni. Boxing lamah pawh kan duai lo a, NT Lalbiakkima chuan hnamdang kan hnek tlu thei tih min hmuh tir a, Cricket leh Basketball lamah te pawh hian hma kan la sawn zelin a rinawm bawk. Kan sawi zo vek seng loa, kan tarlang kim vek seng awm lo e.
Infiamna hmanga Chanchin Tha hril
Khawvel huapa infiamna lama mi lang sar zingah Kristian an nihna pho langa khawvel mit hmuha Lal Isua neitu an nihna tarlangtu kan hmu nasa a. A bikin Football lamah Brazil hoin Kristian an nihna an tarlang nasa a. Mizote en tam ber English Premier League-ah pawh kan hmu fo a; tuna English Premier League player ni mek zingah Chelsea defender Thiago Silva te, Arsenal striker Gabriel Jesus te, Mancherster United midfielder Casemiro te hi chutianga langsar te chu an ni mek a. Mi dang tam tak pawh an awm a, kan sawi lang seng vek awm lo e. Hetiang hian infiammi te hian Infiamna huang chhung chi hrang hrangah Kristian an nihna hi an pholang nasain, Chanchin Tha hril hna hi an thawk tel pah nasa hle a. Alvin Reid sawi ang khian Chanchin Tha hril hna hi infiamna hian a keng nasa hle tih hi a dikin a tunlai em em a, a la ni zel dawn bawk a ni.
Mizo infiammite leh Chanchin Tha hril
Mizote pawhin Pathian malsawmna kan dawnga, infiamna khawvelah hma kan sawnin khawvel hriatah kan in pho chhuak zel a. Hemi kawngah hian kan theih chen chenah Lal Isua neitu, Kristian kan nihna hi pho chhuak zel ila a duhawm hle ang. Kan nun vawngtu leh innghahna atan pawh Pathian thu hi kan infiammi te hian hmang tlat zel se la. Chu chuan tisa leh thlarauah hriselna leh hmasawnna a pe ang a, sâng takah an thlen phah zel bawk ang. Ruihhlo, nulat tlangvalna leh sum leh pai thianghlim lo laka an fihlima, an hming that zelna tur atan pawh Pathian thu hi lo hmang tlat se la. Infiamna huang chhung leh pawnah an nun hi Chanchin Tha nena in mawi leh in mil lo ni zel se; an nun hmanga Chanchin Tha puang darh tu lo ni zel teh se.
Mi tupawh Pathiana innghat tlat leh ring tlat, a nuna Pathian thu lal ber chu a chhe thei tak tak lo a. Chuvangin kan infiammi hlu tak tak te pawhin Chanchin Tha hriltu palai an ni tih in hre reng chungin hmalam lo pan zel turin duhsakna sang ber kan hlan e.