- Mahmuaka Chhakchhuak
He HRINGNUN HI a mak a, hriatthiam a har a, a thinrim thlak chang lah a tam bawk a, a chang phei chuan a lungchhiatthlak bawk thin. Nimahsela, chumi letling thawk chuan a nuam a, a hlimawm a, a hahdam thlak bawk a, thihna lui piah lama chengte ngaihtuah chang phei chuan a vanneihthlak ngawih ngawih chang lah a tam bawk a ni. A awmzia berah chuan he HRINGNUN ah hian engkim a leng a, engkimin hmun luah an tum bawk a, chumi dawng sawng tu chu mi pakhat chauh kan nih thin avang hian a chang hi chuan he HRINGNUN HI a nunrawng ta viau a ngaih theih hi a ni.
A engapawhchu nisela, nang leh kei hian thil tam tak kan hmachhawn tawh a, kan thian thate bulah chuan ngaihnawm takin kan hrilh fo tawh a ni lawm ni? Chutiang bawk chuan thil tam tak kan la hmachhawn zel bawk dawn tih hi kan hriatreng a ngai a, kan damchhung ni mual liam hma hi chuan thil hrang hrang kan tawng mawlh mawlh ang a, khawvel a nih miau avangin chutiang hmachhawn tura Khuanu duan kan ni tlat si a ni. A nuam leh hlimawm chin chiah hmachhawn tumin a hrehawm lam hel tum eng ang mah ila helna kawng a awm tak tak thei chuang lo a, kan helna lamah harsatna chi dangin min rawn nang fuh leh tho thin a, huaisen taka kan hmachhawn a tha ber a, puitling taka kan hmachhawn chiah hian mi eng ang mi nge kan nih tih a hriat a, kan nihna dik tak chu a hriat ta thin a ni. Chumi harsatna leh hrehawmna hmachhawn laia HRINGNUN che vel chu Khawvel hian hmuhnawm a ti a, a thawnthu chu khawvel mihringte hian ngaihnawm an tih ber thin a ni.
Thihna avanga hmangaih ber thente, thihna kut vawt takin kan duh ngawih ngawih lai min man sakte, hmangaih ber te’n tang dang min belh sante hi a tuartu tan chuan a na em em a, nimahsela, chutiang tawrhna chi hrang hrangte chu nang leh kei chauh hian kan lo tuar hauh lo mai a, Leilunga kan awm ve hma daih tawh khan mi za tamin an lo tuarin an lo paltlang tawh a ni. Nimahsela, tawrh lai chuan tuar ta bik riau a inngaihna erawh a awm nameuh mai a, mittui a luang chawl thei lo a, kan sawi tawp thei lo a ni. Chutiang harsatna chu thenkhatte chuan an paltlang zawh loh avang chuan an nunna hlu tak pawh hlut zo loin hruihrual valh chhungah an ring an rawlh mai thin a, a pawi thin mange! Thihna piah lamah chuan engmah a chinfel theih dawn tawh si loh a, HRINGNUN hi a hlut tehlul nen.
He khawvelah hian vawi tam tak kan piang dawn lo a, vawikhat chauh kan piangin vawikhat chauh he HRINGNUN HI kan hman dawn avang hian kan nitin pawh niloin kan darkar khat lek hun pawh hi ngaih pawimawh em em tur a ni a, darkar khat ngaihtuahna avang hian kan nun hian rahbi thar a rah avangin hlimna chhiar sen loh a chang theiin meikhupin a hnungtawlh thei bawk a ni. Midang pun theih loha mahni ngeia hmachhawn ngei ngei hun a thleng ngei ang. Midang i ni lo a nangmah ngei i ni tih kha in hre hmasa phawt ang che. Lemchanna hmunah chuan midang lem changin hun i hmangin i awm pawh a ni ang, chu hmunah chuan i nihna lang hauh loa thiam takin i chanvo i hlen thei a nih phei chuan lemchang thiam tak i ni tihna a ni ang. Chutiang lemchanna hmun anga nun hman i tum reng a nih erawh chuan hrechiangtu apiangte’n an nuih tet tet thung ang che. A chhan enge kan tih chuan mihring hian lemchang nun hi eng emaw hun atan chauha kan ruat vang a ni.
Pathian hian enge he Leilungah hian min din chhan kan tih chuan (a Bible ziak loh lamah) Nu chhul atanga kan chhuah atanga thlan kotlang kan thlen thlenga engkim hmachhawn thei turin min din a ni. Kawng laka chawlhsan a remti lo a, paltlang ngei turin min duh a ni. Chumi thei tur chuan Pathianthuah ngei hian hmun tam takah fuihna thu kan hmu bawk. Eng ti mi pawh ni la, eng hna pawh thawk la, khawi hmuna awm pawh ni la nang leh kei hian nitin hun hi pangngai reng hian kan hmang dawn hauh lo mai a, vawiina i nuih avang khan naktuka nui leh turin in ngai ngawt ngai suh ang che. Chutiang dan chu he HRINGNUN atan hian Pathianin a duang hek lo.
Sum leh pai avangin engemaw chen chu hlimna kan nei ngei ang a, nimahsela hlimna famkim tak tak zawk chu suma leh theih ngai loh tur HRINGNUN in a paltlangah hian a awm zawk a ni. Chumi chu retheih avanga neih theih a ni ngawt lo a, hausak avanga neih theih ngawt pawh a ni lo a, lehkhabu chhiar atanga neih theih ngawt pawh a ni hek lo a, HRINGNUN in a paltlang phawta neih theih a ni.
I HRINGNUN chu engkim hmachhawn turin inbuatsaih la, hlimna vawrtawp atanga thihna kotlang thlenga nun hmang turin vawiin atang khan inbuatsaih rawh le.