Ghulam Nabi Azad chuan politics-a a zinkawng thar a zawh tan ta a. Rin lawk ang ngeiin party thar a din dawn a, a hming leh an puanzar tur erawh mipui duhthlannaah a dah thu a sawi.
Union minister hlui leh Congress party hruaitu hlun tak thin, Azad-a hi tun hnai lawkah an party chhuahsanin Pathianni khan Jammu-a Sainik Colony-ah vantlang inkhawm a ko va, a awm zel dan tur hi a sawia, a party hming tur erawh a sawi lo.
Kum 73 mi, Jammu & Kashmir chief minister hlui hian kar hmasa khan party thar a din fel tep tih a lo sawi tawh a. Unit hmasa ber chu inthlan mai hmabak, Jammu & Kashmir-ah an din tur thu a sawi bawk a. Pathiannia hun a hmannaah pawh hian Jammu & Kashmir mipuite tan a ding reng tih a sawi.
Vantlang inkhawm a pan lai hian chief minister hlui hi bawrtu hi an tam hle tih hmuh theih a ni a. A car atanga a chhuah rualin amah thlawptute chu a bân a vai let a, dawhsana a lawna thu a sawi tura a din hmain a thlawptute hi chibai a buk bawk.
“Ka party hming tur ka la tifel lo va, Jammu & Kashmir mipuiin a hming leh kan puanzar tur chu an thlang ang. Ka party hmingah chuan mi tinin an hriat thiam theih turin Hindustani tih telh a ni ang,” a ti.
Azad-a hian party a din fel hunah chuan BJP emaw, Jammu & Kashmir-a inbun nghet sa – National Conference emaw, PDP emaw nen thawhho an tum dawn nia sawi a awm nghal a. Hetih lai hian NDTV-in an kawmnaah chuan BJP nena thawhho tur chu ngaihtuahnaah a la awm lo tih a sawi a. “Keiin nge anniin hlawkna nei zawk dawn hriat a ni lo,” a ti.
Congress hruaitu hlui hian an party-in Jammu & Kashmir unit-a chanvo an pek thar hnawlin party a chhuahsan zui a. Amah zui hian an state-a Congress hruaitu tam tak an chhuak ve nghal.
Hruaitu hlun hi Congress hruaitu hlun mi 23, president Sonia Gandhi-i hnena lehkha thawna an party insiam that a ngaihzia thlentu, G-23 an tih zinga mi kha a ni.
Congress a chhuahsan hnu lawkah Azad-a hian G-23 zinga mi pathum – Anand Sharma, Prithviraj Chavan leh Bhupinder Hooda te pawh a hmu zui a. Anni hian Gandhi-in party president thlan tur a puan lai renga a chhuah chhan pawh an lo zawt a; mahse, party chhung chu inkawm hrang leh intibikte tan chauhva hmun awmna nia a hriat tawh thu a sawi niin Chavan chuan a sawi.
Azad-a’n Congress a chhuahsan hun hi an party tan chuan kum 2024 inthlanpui lo awm tur inbuatsaih lai a nih avangin a huatthlala hle a. Hetih rual hian a hmain an hruaitu hlun tak tak an lo bang tawh a. Heng zingah Punjab chief minister hlui Amarinder Singh, party Punjab chief thin Sunil Jakhar leh union minister hlui pahnih, Kapil Sibal leh Ashwani Kumar te an tel.