Somalia laili, Hiiraan region-a helhovin mipui hnena ei tur pe tura kal lirthei eng emaw zat an beihnaah hmeichhia leh naupang telin mi 20 vel thah an ni a, an ei tur kente pawh tihchhiat a ni.
“Car-ah bomb an vawm lut a, a puak a ni,” tiin Hiiraan governor chuan BBC hnenah a sawi.
Islamist hel pawl, al-Shabab chuan an tihah chhal nghalin sorkarin a hriatpui silai keng pawlte an bei niin an insawi.
al-Qaeda firfiak pawl nena inzawmna nei pawl hian Somalian sorkar hi paih thlak an duh a ni.
al-Shabab hian Somalia chhim leh laili hmun zau tak hi an thunun mek a, tun hnaiah sorkarin a awp chin leh an inkulhna, Mogadishu khawpui leh a chhehvelah huang zauh tumin an che nasa hle.
Chawlhkar hnih liam taah pawh khan an ram khawpui berah hian khualbuk lian tak an luhchilh a, mi 20 chuang an thi.
Hiiraan Governor Ali Jeyte Osman chuan Zirtawpnia mi tanpui hna thawka ei tur pe tura kalte beihnaah hian mi 27 zet thi an awm thei niin a sawi.
“Hliam tuar thenkhat an awm a, silai a rik khan thenkhat chu birukna zawngin an tlanchhe bawk a. Ruangte kan la khawm mek a, an zingah hmeichhia leh naupang pawh an tel,” a ti.
Osman-a chuan hetianga beitu helho hian civil mite an bei niin a sawi a, khua an hal a, tuichhunchhuahte pawh an tichhia niin a puh bawk.
Tual chhunga hnam hruaitu pakhat, Mohamed Abdirahman chuan beihna thleng chu a rapthlak hle tih a awi a, hetiang renga rawnga chetna hi an chhehvelah tun hmain a thleng ngai lo niin a sawi.
“Heng mite hi civil mi an ni a, hetianga an chunga thleng tur hian engmah tih an nei lo,” tiin a sawi niin AFP news agency chuan a tar lang.
Somalia President Hassan Sheikh Mohamud chuan a sorkar chu an rama ‘firfiaka chetna’ do turin ‘engmah tihhmaih leh ngaihhnathiamna’ a nei dawn lo tih a sawi.
al-Shabab-in thuchhuah an siamah chuan lorry an beihte hi ei tur hrang hrang phur a nih thu an tar lang a. Ei turte chu tual chhunga hel pawl dang, sorkarin a thlawp, anmahni beitute an pek tur a nih thu an tar lang bawk.
Horn of Africa an tih ram bawrah hian khua a kheng nasa hle a, Somalia-ah pawh hian mi sang tel ei tur nei lovin hmun dang panin ei tur an zawng a, UN chuan a aia dinhmun chhe zawk an tawng thei reng niin an sawi.