September atanga November inkar chu dengue hluar hun laia ngaih ni mah se kumin May thla khan Aizawl chhunga veng pakhatah he natna hi a leng chiam tawh a, hemi avang leh tun hnaia veng leh khaw thenkhatah a len zual deuh bawk avangin health department hotuten kuminah a vei an pun hluai an ring.
Tunlaia khua leh veng thenkhata dengue kai a tam chungchanga The Zozam Times-in a kawmnaah health department hnuaia State Vector Borne Diseases Control Programme (SVBDCP) hotute chuan kum tir lam May thla khan Falkland, Aizawl-ah dengue natna vei hi mi eng emaw zat an awm tih an sawi a, he natna hluar huna ngaih thla a thlen hma kum tir lama dengue a hluar tawh avangin kuminah hian he natna vei hi kum dang zawng aia an tam zual an rin thu an sawi.
Dengue natna hian a bikin damdawi a nei lo tih SVBDCP hotute chuan sawiin, “Khawsik an nei a ni chuan Paracetamol ei mai tur a ni a, an nat dan azirin chutiang chhawk leh tidam thei damdawi ei mai tur a ni a, he natna kaite hi chuan ORS leh tui in tam hi an mamawh hle,” an ti.
SVBDCP hotute chuan dengue hi mihringa in kai darh theih a ni lo a, thosi atanga kai theih a nih thu sawiin, “Thosi atanga kai a nih avang hian dengue virus pai thosi hi an inthlahpun zel loh nan tihchimih vat a tul,” tiin an sawi.
Tun hnaia dengue lenna, Edenthar Veng YMA chuan Inrinni khan Taitesena Section huam chhunga khawlaia tui tlinna hmun leh kawra tui luan tlang theih lohnate an thian fai a, thosi no awmna hmuna ngaih theih hmun hrang hrangah DDT an phul bawk.
Edenthar Veng chhunga cheng zingah dengue natna vei, in lam leh damdawi ina enkawl mi eng emaw zat an awm a, dengue vei zat hi chiang takin hriat theih ni lo mah se, sub centre enkawltute hnena in-report chu mi panga an awm a, he natna vei a tam zawk hi chu sub centre-ah hian an in-report lo nia thudawn a ni.
The Zozam Times-in a biakpawh Edenthar Veng Sub Centre enkawltute chuan July thla atang khan dengue vei an awm tan thu an sawi a, hemi thla hian an hriat chinah mi panga bawr velin dengue an vei tiin, hemi avang hian a theih ang anga he natna laka invenna kawngah zirtirna pein, sub centre pantute chu thosi len zar tha a, thosi no pian theihna tui tling tibo tur leh mahni in leh a vel vawng fai turin an ngen tih an sawi a ni.