Mizorama dan hman tak, Motor Vehicle Act siam thatah dan bawhchhiate sum chawi tur a san ang ngeiin dan hman tan a nih hnuah Aizawl Traffic Police sum hmuh a pung nasa.
Dan hluiah licence nei loa lirthei khalhten dan an bawhchhiat avanga sum an chawi thin chu Rs 500 a ni a, dan siam that hman takah erawh Rs 5,000 ni tawhin dan dang bawchhiatnaah pawh sum chawi chu a let aia tam fe te a ni ta.
Mizorama The Motor Vehicle (Amendment) Act, 2019 hman tan ni, September 1, 2022 khan Aizawl Traffic Police-in dan bawhchhia mi 66 manin sum an chawi tling khawm chu Rs 43,800 a tling a, dan hlui hman lai, August 31-ah dan bawhchhia man tam zawkin mi 101 man an ni a, an sum chawi erawh Rs 15,400 a ni thung.
Dan hman tan tuk, September 2, 2022-ah lirthei dan bawhchhia mi 45 an man leh a, sum chawi tlingkhawm chu Rs 21,100 a tling leh niin Traffic Police-in an chhinchhiah.
Ni hnih chhungin dan bawhchhia 111 man tling tawhin sum an chawi zat tlingkhawm chu Rs 64,900 a tling tawh a ni.
Dan hlui hman lai, kar liam ta Thawhtanni atanga Nilaini, ni thum chhunga Traffic Police-in dan bawhchhia mi 244 an mana sum chawi chu Rs 45,400 a nih laiin dan siam that hman hnua dan bawhchhe lirthei 111 an man a, sum chawi chu Rs 64,900 tlingin ni tlem zawk mah se sum lut a punna chu Rs 26,300 lai a tling a ni.