Everton leh Liverpool ten goal lut lo inkhel hmuhnawm an khel a. Point khat ve ve Merseyside derby-ah an insem.
Inrinni zana Goodison Park a inkhelah goal hlauhawm a tam a. Khaw khat club inhal pahnih inkhel an nih angin boruak pawh a sang.
Everton in Tom Davies hmangin goal ban an tihper a. Lehlamah Liverpool tan Darwin Nunez leh Luis Diaz ten an tih per ve bawk.
Team pahnihte goalkeeper pawh an langsar hle a. Everton goalkeeper Jordan Pickford chuan Nunez-a goal khung tur a dan bakah Liverpool substitute Roberto Firmino chu vawi thum a dansak a. Mohamed Salah in goal ban a pet per leh hram hman.
Lehlamah Liverpool defender hlui Conor Coady chuan inkhel a goal awmchhun a khung niin a lang hman a. Mahse an striker thar Neal Maupay ball pet an lo dan atanga a khung chu VAR hmanga endik hnuah pawm a ni lo.
Liverpool goalkeeper Alisson-a’n Maupay leh Dwight McNeil-te goal khung tur a dansak ve leh bawk.
Liverpool manager Jurgen Klopp chuan, “Derby inkhel dik tak a ni. Boruak a sang a, hmuhnawm tak tak a tam. An goal khung kha ka hmu chiang lova, mahse offside an phar chuan a ni ang.” a ti a.
Everton manager Frank Lampard chuan, “Kan kheltha a, 0-0 inkhel hmuhnawm ber zing ami a ni ang.” a ti a. VAR thutlukna a sawisel zui bawk.
City pawh chak zo lo
Premier League champion lai Manchester CIty tan striker Erling Haaland chuan goal khung leh mahse an chakpui thei lova. Aston Villa nen 1-1 in an inhnehtawk.
Villa Park-ah Haaland-a’n second half tan tir lamah Kevin de Bruyne ball cross chu a khung a. Hei hi Leon Bailey chuan minute 74-naah Aston Villa tan a sut.
Aston Villa manager Steven Gerrard chuan an result chu bul an tan that loh tlansan nan an hman theih a beisei thu a sawi.
‘Inkhelh hma atang tawhin tumahin kan lakah beisei an nei lova, mahse zanina kan inkhelah ka lawm hle a. Point hmuh kan phu a, point pawimawh tak a ni ang.” tiin an chak hnuah a sawi.