An hmalam huna an sum lakluhna turte nasa taka danglam phah tur khawpin Barcelona in team insiksawi nan hma an la a, mahse khelmual chhungah a rah an seng chhunzawm zel. Sevilla lakah 3-0 in hnehna an chang a, season bul an tan tha.
Inrinni zanah Barcelona in Ramón Sánchez-Pizjuán Stadium tlawhin inkhel an hmachhawn a. Striker thar Robert Lewandowski chuan tun La Liga season a a goal nga na khungin awlsam takin Blaugrana an chak.
Barca tan hian Raphinha leh Eric Garcia ten goal khat ve ve an khung ve bawk.
Polish striker Lewandowski hian defender thar Jules Kounde ball siamsak tha tak mai chu goal-ah a khung a. Tun dinhmunah match li atang goal nga khungin Celta Vigo forward Iago Aspas nen league top scorer an ni mek.
Hetihlai hian Julen Lopetegui-a team te hi season liamta che tha mahse bul an tan chhia a. Khelh li atanga vawi thum an tlawmna niin 17-naah an awm.
Barcelona coach Xavi Hernandez chuan, “Kan team balance a tha tak zet. A tir minute 15 kha harsa kan ti deuh a, a bakah erawh kan buai lova, kan kheltha hle. Inkhel kan thunun dan thlir phei kha chuan kha aia goal khung hnem zawk tur kan ni. Tuna kan khelhthat lai hian result tha kan neih chhunzawm zel a pawimawh.” a ti.