Dan thar hnuaiah sum hmuh a tha nghal rem rem
Mizoramah pawh dan thar The Motor Vehicle Act hman a nih tak avangin lirthei document fel lote sum chawi pawh a tam chho ta hle mai a, traffic police lam pawhin sum an hmu thahnem tawh hle. Sorkar tan chuan revenue tha tak pawh a ni thei awm e.
He sorkar laipui thuchhuak hi Mizoramah hun rei fe hman a ni lo a, mahse central lam atanga nawrna a nasat em avanga hman ve tak a nih thu thuneitu lam chuan sawiin, hei tak hi state sorkar tan chuan malsawmna chikhat a tih theih ang.
Hetiang hi kan dinhmun a nih avangin lirthei khalhtu leh neitute tana document ngai tihna hmun hrang hrang a lun thei hle a, thui deuh deuh intlar pawh an la awm reng bawk.
Mizorama The Motor Vehicle (Amendment) Act, 2019 hman tan ni, September 1, 2022 khan Aizawl Traffic Police-in dan bawhchhia mi 66 manin sum an chawi tling khawm chu Rs 43,800 a tling a, dan hlui hman lai, August 31-ah dan bawhchhia man tam zawkin mi 101 man an ni a, an sum chawi erawh Rs 15,400 a ni thung. Inthlau nghal rem rem tak a ni.
Mipui lam pawh kan fimkhur chho telh telh turah ngai ila, chutihrual erawh chuan sorkar lam hian hun engemaw tichen chhung chu ngaihhnathiamna nen mipuite hi min hriatthiam kan ngai dawn hle in a lang. A lehlam zawnga sum tuakna tur a nih theihna lai a awm avang hian sorkar hi khauh bur lo se a duhawm hle.