Pakistan chhimthlang lam, tharum thawhna thlen fona thinah bomb paiin venhim hna thawktuten mi an endikna bulah a puak thei pai tipuakin paramilitary force pathum an thi a, mi dang 15-in hliam an tuar bawk.
Thihchilh bomb tipuaktu hian Balochistan province khawpui, Quetta atanga chhim lam km 25 vela hla, Quetta-Mastung Road-ah Frontier Corps-in mi an endikna bulah a a tipuak niin police officer Azhar Akram chuan Pathianni khan a sawi.
A chuanna motorcycle-ah hian puak thei kg ruk a pai a, lirthei pakhat lo ding chu a su puak niin Akram chuan a sawi.
Hliam tuar thenkhat chu an dinhmun a that vak loh avangin thi hi an pung thei niin a sawi a. Security post atanga hla tak takah mihring taksa bung per pawh a darh niin a sawi.
Beihna hi Pakistan Taliban, TTP tia an sawi mai chuan an tih a nih thu an sawi a. Tun tum hi Taliban-ten Afghanistan-a ro an rel leh hnuah Pakistani venhim hna thawktute laka chetna hmasa ber a ni.