Delhi Police chuan Thawhtanni khan ‘India-a car ruk ching lian ber’ tia an sawi, Anil Chauhan chu an man a, ram chhung hmun hrang hrangah car 5,000 vel a ru tawh nia hriat a ni.
Police chuan kum 52 mi hi pawk taka nungin Delhi, Mumbai, leh hmarchhakah pawh in hmun lo ram a nei niin an sawi.
Police chuan ram chhunga car rutu lian ber niin an sawi a, kum 27 chhungin car 5,000 chuang a ru niin an sawi a. Central Delhi Police hnuaia Special Staff-in Desh Bandhu Gupta Road bulah an nangching ta niin an sawi.
Chauhan-a hi car aruk piah lamah ralthuam tawlhah pawh a inhnamhnawih niin an sawi a. Uttar Pradesh atanga la chhuakin hmarchhaka dan pawna hnawl helho hnenah a hralh thin niin an hriat.
Delhi-a Khanpur venga a awm lai chuan Chauhan-a hi autorickshaw khalh thin a ni a, kum 1995 hnu lam atanga car ruk a ching.
A hun hmasa lamah hian Maruti 800 car a ru deuh ber a. Ram chhung hmun hrang hranga mi ruin Nepal, Jammu & Kashmir leh hmarchhak state-ah a hralh thin.
Car a ruknaah hian taxi driver pawh a that nual nia ngaih a ni.
Assam-ah pemin a cheng zui a; Delhi, Mumbai leh hmarchhak state-ah in hmun tha tak tak a neih avangin nuamsa angreng takin a khawsa zui nghe nghe.
Enforcement Directorate pawhin a sum neih dan a dik lo nia a lan avangin pawisa tihchingpen thubuai an ziak lut.
Tun hma pawhin Chauhan-a hi man a lo ni tawh thin a, kum 2015 phei kha chuan Congress MLA nen man an ni a, kum nga tangin kum 2020 khan a chhuak.
A lakah hian thubuai 180 zet ziah luh a ni.
Nupui pathum leh fa pasarih a nei niin police-in an sawi a. Assam-ah hian sorkar hnuaiah contractor-in a awm a ni.
An man lai hian a kut atang hian pistol paruk leh a cartridge pasarih a lo kawl tel a ni.