Aizawl: MPCC General Secretary Joseph Lalhimpuia chuan Mizoram tan Congress a sorkar leh a ngai niin a sawi.
Nimina Lunglei District Congress Committee (LDCC)-in an pisa-a inkhawmah thu sawiin Joseph Lalhimpuia hian Congress-in an sorkar laia hmasawnna hna thawhte kha MNF sorkar hian a chhunzawm duh lo niin a sawi.
Congress party a sorkar laia Tuirini Hydel Project-a a hmalakna chu MNF khan chief minister pawmpuina ngeiin an chhunzawm duh lo a; mahse, tun hnuah central-in chhunzawm leh tura a ti hial tih a sawi.
Congress sorkarin Referral Hospital tipuitlingin MBBS zir theihna hialin a din chho tih a sawi a. Indo-Mynamar leh Indo-Bangladesh insumdawn tawnna tur pawh Congress sorkar hmalakna leh bul tan vek a nih thu a sawi a. Tuna Act East Policy tih ni ta, Look East Policy pawh Congress sorkarin a ngaihtuah ber a nih thu leh, Tlabung border trade pawh khatih laia MNF sorkar khan tihngaihna vak hre loin dawhkan atanga ram zau tak pek bak an kalpui lo a, kum 2015 khan central-in titawp tura a rel ni mah se Congress sorkarin an nawrna avangin Tlabung-ah Integrated Check Post (ICP) dah a ni leh ta tih a sawi bawk.
“Vawiina kan mamawh ber chu mi rinawm, sum leh pai enkawl thiam kan mamawh a. Tunah hian mi dik, unaute pawisa kawlsak ve ngai lo, ram tan Pu Lalsawta a rawn pen chhuak a, a kaihhruaina hnuaiah Mizoram hian hma lam a rawn pan leh dawn a, mi tam takin beiseina an nei sang hle a ni,” Jospeh Lalhimpuia’n a ti.