Kuhva chingtuten an kuhva thar hralh kawnga harsatna an tawhte zirchianga a sutkian dan tur kawngte dap tura Taitesena Group YMA leh Langkaih Group YMA-in a din, Jt. Group YMA Study Team Leader Vanlalruata Pachuau leh Secretary Lalvenhima Ralte ten nimin khan Chief Minister Zoramthanga hmuin kuhva chingtute harsatna tawh chungchang an sawipui.
Chief minister chuan Hachhek biala kuhva chingtute harsatna tawh hrang hrangte an lo hriat thu Jt. Group YMA Study Team aiawhte chu lo hrilhin, a hriat fiah duh laite a zawt a. Tun thlaa Union Home Minister Amit Shah hova Mizoram leh Assam chief minister-te inbiakna turah Jt. Group YMA Study Team duh dan chu sawi lan a tum thu a sawi.
Jt. Group YMA Study Team aiawhte chuan Hachhek biala kuhva chingtute harsatna tawh hrang hrangte sukiang tura kawng hrang hranga hmalak a nih tawh dan te, amah chief minister hnenah ngei pawh an thlen tawh thu te chief minister chu an hrilh.
Chief minister pawhin Jt. Group YMA Study Team hmalakna chu tha a tih thu leh sorkar chetna tur chinah pawh a tul ang zela thawkhova an harsatnate hrilh thin turin a lo chah ve bawk.