Formula 1 world champion Max Verstappen chuan intlansiak entu a hnapui mi 109,000 hmaah hnehna a chang a. Dutch Grand Prix hmuhnawm takah a tawpa dingchangah tangin pakhatna a hauh.
Pathianni zanah Circuit Zandvoort-ah Dutch Grand Prix hi tlan a ni a. Red Bull driver hian intlansiak a khaihlak hnua lap 60-na a tlan that leh a nihin a hma a awm Lewis Hamilton chu a pel nghal thuai. Car dang zawng aia tlanchak Verstappen hian a tawp thleng hma hruai tluanin tun season-ah intlansiak 15 atanga vawi 10 nan a chak. Point 109 in world championship-ah hma hruai tawhin engtikahnge a champion chian ang tih zawhna bak a awm tawh lo.
Hnehna chang tura dinhmun tha tak luah hman Mercedes car khalhtu Hamilton chu intlansiak tawp lam thil thlen danah a lawm lova. Midangin car ke an thlak laia a car ke an thlak ve lo chu chiang takin a tuar.
Hei vang hian a teammate George Russell leh Ferrari driver Charles Leclerc ten an lehpelh theih phah a ni.
Mercedes hun a inhawng teuh
Formula 1 nipui chawlh hnu a car nei chak fal tak Red Bull bawk tun kartawpah rin hlawh an ni leh chungin an beisei angin Zandvoort-ah bul an tan lo. Free practice hmasa berah Verstappen-a gearbox a chiang lova, a dangah Ferrari leh Mercedes angin an tlanchak thei lo.
Hei hian team dangte tan huntha a inhawng dawn niin lantir mahse qualifying-ah insiamtha in Verstappen a tlanchak ber. Ferrari car pahnihten dawtin an inel tawk dawnin a lang.
Hetihlai hian intlansiak ni ah Italian team in ‘race pace’ ah an tluk lo leh a, tuialhthei khat a car a tlanin an car a danglam thin.
Verstappen-a’n hma hruai nghalin Leclerc-a’n um mahse a fal tulh tulh avangin a chak awlsam leh dawn tih a lang.
Nimahsela Mercedes an awm. Anglo-German team in season chawhma lamah car an siam fuh loh avangin an elpui liante pahnih an pha lo hle. Tun tumah erawh tlankawng awmdan in car a mil avangin beiseina an nei sang.
Palina leh parukna atang tlan tanin ‘risk’ an la. Lap 72 tlan turah hian car ke vawikhat chiah thlak tumin ruahmanna an siam. An ti fuh teuh.
Verstappen-a’n car ke vawi hnih thlak a ngaih miau avang leh team lian dang hman ngam loh tyre sak ber chu Mercedes in an tlanchakpui theih avangin an chan a that phah. Verstappen-a’n a car ke a thlak nawn hunah hnehna chang turin a um an ngai dawn. Red Bull car hi tlan chak zawk mahse intlansiak zawh hma in Mercedes car pahnihten dan khawtlai theih an inbeisei.
Mahse lap 47-na leh lap 55-naah intlansiak thlak danglamtu a thleng. Red Bull junior team Alpha Tauri driver Yuki Tsunoda chuan a car ah harsatna a nei niin a sawi a, kawngsirah a ding. Virtual safety car puan niin hei hi remchangah Verstappen-a’n a la a, a car ke thlakin Mercedes car te hnunga awm lovin a chhuah leh theih phah.
An tlan tan leh atanga reilote ah lap 55-naah Alfa Romeo driver Valtteri Bottas-a engine a thi a, safety car pangngai tirh a ngai.
Tlan tan leh hunah lap a tam tawh dawn lo tih an hriat avangin a hmalam a awm car ten tyre nem ber vuah nan remchang an la vek. Verstappen-a’n a car ke a thlak nawn leh avangin Hamilton-a’n hma a hruai leh a, a hmasa bera a awm avangin a team in an ko lut ve ngam lo.
An tlan tan lehin tyre tlanchak pui theih zawk vuah Verstappen-a’n a pel nghal thuai, an inkara awm tur a teammate George Russell a awm tak loh avangin Hamilton-a tan tih theih a awm tawh lo.
Verstappen chuan, “Intlansiak tluang pangngai tak a ni lo chunga hnehna chan hi thil lawmawm a ni. Kan strategy tum ang kan hmang thei lova, a tawpa safety car chhuah a ngaih hma khan kan dinhmun a chhe hman hle. Mahse safety car rawn chhuah kha remchangah kan la thei a, kan chak phah.” a ti.
Hamilton chuan, “Kan car leh kan ruahmanna a fuh em avangin pakhatna leh pahnihna ka beisei hman hle. Kan chetthat tum ber a la ni ang. Mahse a tawpa khatianga kan tisual ta avang khan ka insum hman lova. Ka team bulah ka tawng ta chiam a ni. An hnenah pawh thupha ka chawi.” a ti ve bawk.
Ferrari leh bawk
Tun season-ah an car in fak a hlawh, an team erawhin nuih an hlawh chhunzawm zel. Car leh driver nei tha Ferrari an che fuh lo leh. Carlos Sainz-a car ke thlak tura an ko luhin tyre thar an lo inring kim lova, hun tam tak a hloh phah.
Hei chauh hi la ni lovin tyre an thlak nawn lehin Zandvoort pitlane chep takah Alpine car nena insu teuh takin an tlanchhuahtir. Hrem a nih phah a, panganaah tlan zo mahse pariatnaah a tla thla.
Italian team hi Red Bull in season laihawl a car an tihchak avangin an elpuite pha lo takin an awm mek a. Team lamin tihsual an neih ngun bawk avangin Mercedes nen an inel tura ngaih an ni tawh.