Italian MotoGP rider Francesco Bagnaia chuan tunhnaia a chetthat a chhunzawm a. A zawnin intlansiak pali a hnehna a channa ni turin San Marino Grand Prix-ah pakhatna a hauh.
Pathianni tlaia Misano World Circuit a intlansiakah Italian mi Ducati khalhtu hian ‘three-place grid penalty’ neiin bul a tan a. Intlansiak tawp hma erawhin a hnampui Enea Bastianini chu a pel a, a tawp lama an inum a hmuhnawm hle.
Maverick Vinales chuan pathumna a hauh ve bawk a. Pakhatna leh pahnihna inkar hi zim hle in Gresini Racing rider Bastainini leh Bagnaia inkarah second 0.034 chauh a awm a. Bike intlansiakah hei hi mit a hmuh mai harsa tham khawpa inhnaih a ni tawh.
Lap hnuhnung berah bike pahnih an intauh teuh hle a, Bastianini-a’n a um ngawrh hle. Kual hnuhnung berah a pel thei lova, mahse a tawpna tur ngilah chak takin a um a, meter tlem a zawnga la thui nise hnehna a chang thei ang.
“Intlansiak pumpui khan ka hnung chiahah hian an bet reng ang maiin ka hria a, thildang ngaihtuah theih a ni lo. Fimkhur leh fing taka intlansiak ka ngai pawimawh a, inthlahdul miah loh kha a pawimawh hle.” Bagnaia chuan a ti.
He intlansiak hi kum 36 mi, MotoGP a vawi 15 pakhatna hauh tawh Andrea Dovizioso intlansiak hnuhnung ber a ni bawk.