La Liga a tlawm la nei lo Villarreal chu pathumnaah an inhlangkai a. Elche lakah 4-0 a chakin hnehna pawimawh an chang a, point hnih chauhin hmahruaitu Real Madrid an pha lo mek.
An stadium El Madrigal siam that a nih avanga Estadi Ciutat de València a an home match khel rih Villarreal hian Pathianni zanah first half-ah striker Gerard Moreno leh midfielder Giovani Lo Celso hmangin goal an khung a. Second half-ah Francis Coquelin leh Jose Luis Morales ten goal an khung belh.
Hei chauh hi a ni lova, Unai Emery-a pawlte hian goal venghim lehin La Liga a goal chhuah lo awmchhun an ni mek.
“Nikum lamah inrintawkna kan neih loh a lang leh thin a, kan result pawh a nghawng. Mahse tun season a kan game hmasa pathum away inkhel vek a ni a, he chona hi hnehsawh takin kan paltlang vek. Zaninah kan home match hmasa ber a ni a, he club-ah hian kum hnih ka awm tawh a, kan home inkhel hmasa berah hnehna kan chang ngai lo. Chuvangin zanin kha chona thar a ni leh a, tha takin kan paltlang leh a, team in fak a phu.” tiin a sawi.