Pakistan thuneitute chuan an rama dil lian ber luang liam tur dan tuma an beihna hnuhnung ber hlawhchham mah se theihtawp an chhuah chhunzawm zel.
Sindh province chhimchhak lama Manchar Lake-ah hian ni eng emaw zat fur ruahtui tam tak an dawn hnuah a tui chim chin a sang tawh hle.
A luan liam mai a hlauhawm tawh avangin a hnaihah cheng mi 1,00,000 vel an insaseng tawh.
Thawhtanni khan province-a irrigation minister chuan Reuters hnenah dil tui hi a la kâm thei lo tih a sawi.
Sindh province hi Pakistan-a ei tur lam chi thar chhuah zahve zet thawhtu an ni a, an rama eibar dinhmun hniam mek karah fur na tak an tawn avang hian an tam mai hlauhthawnna a lian tawh hle.
Pakistan-a tui lian hi mi maktaduai 33 velin tuar mekin naupang 458 telin mi 1,314 an thi tawh niin an ram National Disaster Management Agency chuan a sawi.
Tui lianin a tihchhiat hi $ tluklehdingawn 10 hu zet a ni tawh bawk.
Pathiannia dil tui a lian liam khan thingtlang khaw hnih chimin mihring chen tamnaa a luan liam zel loh nan theihtawp an chhuah zel.
Tunah hian khaw 400 vela mi 1,35,000 chuang dinhmun derthawngin an awm mek a. Heng khaw tam taka chengte hi kartawpah khan hmun himah insasengtir an ni.
Thawhtanniah pawh khan dil chim chin hi hlauhawm tak a la ni reng tih thuneitute chuan an sawi.
Provincial Irrigation Minister Jam Khan Shoro chuan news agency Reuters hnenah tui chim chin hi tlahniam chak lo mah se a tawlh hret hret tih a sawi a; mahse, a hlauhawm tawh lo tia sawi chi chu a nih loh thu a sawi.