Australian mipa naupang kum li mi lek chuan a hma ni chiaha a nuin tih dan tur a hrilh anga tiin ambulance a ko va, a nu thi tur a chhanhim.
Monty Cocker-a hian national emergency number – 000 chu August 27 khan biain, “Ka nu a tlu,” tiin a hrilh.
“An address min hrilh a, tukverhah lo dakin min lo vai a ni,” tiin paramedic Mark Small chuan a sawi.
A mi kohte an thlen pawh hian Monty hi chiai miah lovin in chhunga a nu, Wendy-i nikhawhrelova tlu an buaipui lai chu a theih ang angin a pui bawk.
A remhriatna leh a nachang a hriatna chuan thil a tidanglam tih Smalls chuan sawiin, “A bikin tluka lu sawha nikhawhrelova awm rei chuan a hlauhawm bik,” a ti.
Thawhlehni khan damdawi thiamte hi Launceston, Tasmania-a an chenna inah kal lehin Monty-a hnenah hian chawimawina thuziak an hlan a ni.
Monty-a nu, Cocker-i hi nurse a ni a, a hma ni chawhnu khan a fapa hnenah hian emergency-a mi biak dan tur chu a hrilh thu leh hman nghal ngaia an awm a rin loh thu thuthar lakhawmtute hnenah a sawi a. Monty-a hian naupang danglam bik angin a inngai lo va, a thil tih chu ‘thil awlsam tak’ tiin a sawi.
“A pi a lo kal pawhin, ‘Khawnge kan superhero chu?’ a rawn ti a, ‘Superhero ka ni lo, hero chauh ka ni,’ tiin a lo chhang,” tiin a nu chuan a sawi.
Cocker-i hian a tluk hma hian a nawmsam loh avangin a pasal biak a tum a; mahse, chu pawh ti hman lovin a tlu ta niin a insawi.
Smalls- chuan, “Paramedic-ah hian kum 13 ka thawk tawh a, naupangin ambulance an lo ko fo va; mahse, kum li mi lekin a koh hi chu ka la hre ngai lo,” a ti.