Kum 2021 chhung khan India hmarchhakah kawngpuia chetsualna tum 10,709 zet thlengin mi 4,732 chuan nunna an chân niin National Crime Records Bureau (NCRB) chuan a chhinchhiah.
Hmarchhaka kawngpuia chetsualna hi Assam (8,651)-ah thleng tam berin Tripura (687) leh Manipur (672)-in an dawt.
NCRB-in a chhinchhiah dan chuan Assam-ah hian mi 3,843-in an thih phah a, thihna a thlen tamna ber a ni bawk.
Tripura chuan dawtin mi 271 an thi a, Meghalaya chu Manipur aiin lirthei chetsualna thleng tlem mah se thi tam lamah 3-na niin mi 176-in an thi.
NCRB hian kawngpuia chetsualna thleng leh thite a chhinchhiah thin a. Chetsuala a chhinchhiah zingah hian kawngpuia lirthei chesualah bakah rel chesual leh rel leh lirthei kawng intawhna laia chetsualna thleng pawh a chhinchhiah tel.
NCRB chuan ram pumah kum hmasa, 2018 aiin nikumah kawngpuia chetsualna thleng a tlem zawk tih sawiin kum 2018 khan vawi 4,74,638 thlengin nikum kha chuan vawi 4,67,171 chauh a thleng niin a tar lang.
Hetih rual hian lirthei 100 zela chetsualna tawk hi 0.6 a la ni a, hei hi kum 2020 nen a la inang thung.