Aizawl: Nimin khan Kolasib DC Office Conference Hall-ah DC John LT Sanga kaihhruaiin Inter State Border Meeting neih a ni a, thla hlui ni 24-a Assam lam DC-te nena meeting an neih chungchang an thlirlet.
Meeting kaihruaitu Kolasib DC chuan Assam lam district pathuma DC-te nena meeting an neih chu state pahnih home minister-te inbiakna bawhzuina a nih thu a sawi a, ramri buaina tak tak hi chu DC level-a sawia fel thei a ni lo a, high level inbiakna bakah union home ministry lam thu a nih thu a sawi.
Hetih rualin ramri-ah eng eng emaw issue a awmin an ni lo chu dawr tur an nei chuang lo a, la hriat loh leh la hmuh miah loh zuk dawr ai chuan lo hmelhriat tawhsa dawr hian awmzia a nei thui em em tih sawiin, hemi kawngah hian state thenkhata ramria depa DC-te nena thutkhawm hi chu thil tha tak a nih thu a sawi.
Kolasib SP Vanlalfaka Ralte chuan ramria venhimna chungchang sawilangin, state ramri-ah hian police-te hian Border Out Post (BOP) neih sa a awm nual thu te, nikuma ramria buaina a chhuah hnuah khan temporary-in BOP tam tak siam belh a nih thute a sawi lang bawk a ni.
Meeting-ah hian DC leh SP bakah hian SDO (S) Kolasib, SDO (C) Vairengte leh SDC Kolasib leh Bairabi te bakah Police lam hotute an tel a. Assam-a district pathuma DC-te nen an meeting-a resolution an siam hrang hrangte thlir letin a bawhzui dan turte an sawi ho a ni.