Lawngtlai District Retailer Association-in buhfai semchhuah kawnga harsatna an tawh te sutkian a nih hma chuan buhfai khul leh semchhuah rih loh an tum thu an sawi.
Food, Civil Supply & Consumers Affairs Department-in electronic point of scale (EPoS) hmang chauha buhfai pe chhuak tura a tih laiin, Lawngtlai district-ah internet signal mumalloh avangin finger print hmuh theih loh leh dam loh leh engemaw harsatna vanga kutzungpui nem theilote an awmin harsatna an tawk niin Lawngtlai Dist Retailer Association chuan an sawi a. Internet signal duhthusamlo avangin EPoS hman kawngah harsatna tawk thin mahse, khawsak harsa tak tak te chanai buhfai chu pekchhuah loh harsa an tih thu an sawi.
Lawngtlai District Retailer Association chuan EPoS hmanga pekchhuah atang chauha sorkarin a teh avangin khawsak harsa leh buhfai mamawh tak tak te EPoS kaltlang lova an pekin buhfai sembang nei anga ngaih an nih thin thu leh chu chu sorkarin thla thar atan rin tir a tum bawk si avangin harsatna an tawk niin an sawi a. Buhfai sem bang nei anga ngaih zingah pawh sorkarin duhsak zawng a nei emaw tih turin EPoS hmanga buhfai semchhuak chhe tak te pawh sem bang tlemte nei an awm thei chu a khairuallova an hriat thu an sawi.
Harsatna an tawh chu sorkarin chinfelsak thuai se an duh thu Lawngtlai District Retailer Association chuan an sawi a. An harsatna tawh te chinfel a nih hma chuan retailer ten buhfai khul leh sem chhuah an tum rihlo tih thuchhuah siamin an tarlang bawk.