Aizawl : ZPM thalaiin Congress sorkar laia Rs. nuai 113.92 tihchingpen nia lang chungchanga Lokayukta-a FIR an thehluh kal zelah a mawhlatute an insawifiah zawh loh avângin chhui zui turin Lokayukta-in Anti corruption bereau (ACB) a ruat niin an sawi.
ZPM thalai chuan Congress sorkar laia Ministry of DoNER atanga sum hmuh hmanga sorkar hnathawkte hnena computer training pekah training zingah hming lem 1300 hmuhchhuah a nih thu an sawi a. Heng hming lem te training-na senso Rs. nuai 113.92 chu a tihchingpen nia sawiin, kumin April ni 5 khan Lokatukta-ah FIR an thehlut tih an sawi.
ZPM thalai chuan “Congress rorel laia sorkar hnathawk hming lem 1300 zet hmanga Rs. nuai 113.92 eirukna hian Congress party chu ruling an nih laia sulhnu pawr tak neia sapatal ṭhin, opposition-a an awm apianga piangthar dera mipuite hnena ngaihdam dîl leh chiam ṭhin an nih zia a pholang chiang hle” an ti a. Congress party hnena sorkarna pek chu vawkpui kawr haktir nen thuhmun rengah mipuiin an ngai nia sawiin, mipuiin Congress-ah rinna an nghat ngam tawh lo niin an sawi.
ZPM thalai chuan “Congress chu opposition-a an awm hian ṭhat loh theih lohna bawmah an awm a nimai tih hi Mizoram mipuite ngaihdan a ni” an ti bawk.