US Open mipa singles inelna a champion tura rin hlawh ber Rafael Nadal chu kumin a Grand Slam inelnaah a vawikhatna atan a tlawm a. Fourth Round-ah Frances Tiafoe chuan a hneh.
American mi Tiafoe hian entu mipui tan hlawh takin New York a vawi li champion tawh Nadal hi 6-4 4-6 6-4 6-3 in a hneh a. Spanish superstar in record ni lai Grand Slam title 23 a lak tawh chu belh turin a hlawhtling zo lo.
Nadal hian set li naah 3-1 in hma hruai hman mahse Tiafoe hian rilru paukhauhna tilangin hnehsawh takin a beilet a. A zawna game 5 la zuiin quarter-final a lut.
Semi-final luh inchuh turin seeded number 9 changtu Russian Andrey Rublev a hmachhawn leh ang.
Seeded number 22 ni lai Tiafoe hi Arthur Ashe Stadium in an lawm hle a. Kum 24 mi chuan, “Vawiinah ka tan thil duhawm danglam a thleng. Han sawi zui ngaihna pawh ka hre lo, ka hlim a, ka lawm. Ka khingpui hneh tak hi khawvela player ropui ber zing ami a ni a, a lakah ka kheltha hle.” tiin a chak hnuah a sawi.
Inkhel dangah kum 2014 champion Marin Cilic chu Spanish rawlthar kum 19 mi Carlos Alcaraz-a’n 6-4 3-6 6-4 4-6 6-3 in a hneh ve bawk a. He result avang hian kumin US Open mipa singles-ah a vawikhatna atana Grand Slam title la an awm dawn. 11th seed Jannik Sinner nen an inkhel leh ang.