Mizoram a Muay Thai inelna lian LPS Pro Muaythai Championship chu October 7-ah tan tur a ni a, September 12 atangin tel tur tan LPS Office, Zarkawt ah entry form lak chhuah theih a ni ang.
Kum 15 atanga 45 inkar a duh apiang tel theih a ni dawn a, September 12 atanga October 1 thlengin tel tum tan LPS Office-ah form theh luh theih a ni a, October 3-ah tel turte inbukin October 5-ah fixture tar chhuah a ni dawn.
Chiang zawkin
October 7 atangin R Dengthuama Indoor Stadium, Mualpuiah inelna tan a ni dawn a, weight hrang panga – kg 48 chin hnuai lam flyweight, kg 48 leh 54 inkar bantamweight, kg 54 atanga 63.5 inkar lightweight, kg 63.5 atanga kg 71 inkar welterweight leh kg 75 chin chung lam super middleweight huangah title inchuhin, lawmman pawisa fai cheng nuaithum singruk sem chhuah tura ruahman a ni.
2010 khan a vawi khat nan Muaythai Association of Mizoram leh LPS Vision-in Muaithay Championship an buatsaih tawh a, kum 12 hnuah danglam leh hmuhnawm zawka huaihawt tumin hma an la mek a, fighter-te ring chhungah ni lovin mixed martial arts an khelhna cage chhungah an inbei dawn a. Amateur huanga invenna tlem thei ang bera khelh tur niin, kiu venna, elbow guard chiah an hmang dawn a ni.
Inelna lian leh langsar
Olympic Games thlenga Mizo thalaite an kal chhoh theihna tura hma lakna peng pawimawh takah Mizoram Muaythai hruaitute chuan an ngai a, Mizo player thate tana inphochhuahna remchang leh hma an sawn theihna tura pawimawh tak a nih thu an sawi bawk.
Flyweight-ah Asian silver medal la tawh Joseph Vanlalhruaia (Hunthar), India aiawh tawh Benjamin Zonunsanga (Luangmual) leh national gold medal awrh tawh R Lalbiaktluanga (Zemabawk) te chu champion tuma inel tur langsar an ni ang.
Bantamweight-ah national gold medal la tawh Lalruatkima (Falkland), lightweight-ah national a gold medal dawng tawh ve ve Paul HD Lalruatkima (Selesih) leh Laldingngheta (Dawrpui), welterweight-ah Lalchhuanmawia (Republic Vengthlang) te langsar tura beisei an nih bakah, pa lian, kg 75 chin chung lamah India aiawh tawh Lalthasanga (Tanhril) leh national a gold medal awrh tawh Lalhmunsanga (Luangmual) te tan hun tha a inhawng dawn.