- Mahmuaka Chhakchhuak
Pu Buanga Award 2022 thlang turin Top Ten chin chu chhawpchhuah tawh a ni a, tunah hei Top Five pawh thlan chhuah leh a lo ni ta. A thlangtute hian an uluk hle mai a, heng zing atanga Top Three leh Topper chu thlan chhuah huphurhawm tak tawh tur a ni.
Zofate zinga ziak mi kan neih mi hlu tak takte hi an chhuanawm hlawm em em a, kum tam tak liam tawha a thuziakte hi vawiin hun thleng pawha la ngaihnawm hle hlu hi engemawzat an awm. Chung zingah chuan tuna kan hmuh theih china Essay puitling ziak hmasa ber chu Kaphleia niin April 11, 1938 leh April 24, 1939 inkara a ziah zawh tak THLIRTU hi a ni. He Essay hi I.A a zirlaia T.B natna avanga Calcutta-a a awmlaia a ziak niin Mizoram a hmuh dante, hunpui inlet a thlir dante mai bakah mihring rilru leh awmdante chu thiam takin a ziak a. A ngaihnawm a, chhiar tawh pawha chhiar leh chakawm tur khawpin a ziak thiam a ni. A ni ang bawk hian Rev. Zairema hian ‘Ka pa, ka ei zo vek mai dawn e aw’ tih leh ‘Neuh neuh’ tihte chu kum 1941 vel khan alo ziak tawh bawk a, anni ang bawkin C. Thuamluaia, Zikpuii Pa leh J. Malsawma (Thanpuii Pa) te pawh hian kum 1950 hmalamah khan Essay an lo ziak tawh bawk.
Heng ziaktu hmasate hi chuan mual min lo liam san tawh a, an ngaihawm hle a ni. Anni hnung zui hian mi chhuanawm tak tak an rawn chhuak lehin tuna PU BUANGA AWARD dawng tura Top Ten-a thlanchhuahte zingah ngei pawh hian an lang a, a thente phei hi chu kum upa deuh tawh an niin a thente erawh an la thalai hlawm viau thung. An zavai hian an chhuanawm em em hlawm a, zofate tan sulhnu tha tak tak hle hlu tak tak min lo hnutchhiah tawhtute vek an ni. A thente hi chu ziakmi tana chawimawina chi hrang hrang buatsaih pawh lo dawng tawhtute an ni a, chutiang chawimawina dawng rihlote pawh an nep bik chuang hauh lo.
Tuna Top Ten atangin Top Five atana heng a hnuai amite hi thlan chhuah leh an ni a, reiloteah an zing atangin Top Three thlang lehin chumi atang chuan Topper thlan chhuah leh tur a ni ang.
Tuna Top Five thlan chhuahte chu hengte hi an ni a:
C. Chhuanvawra
Dr. Lalzuia Colney
J. Malsawma (Thanpuii Pa)
Prof. RL. Thanmawia
Lalrammawia Ngente
Hetiang hian an chanchin tawite tein han sawizui nghal ila:-
C. CHHUANVAWRA; Kum 1941-ah khan Leithum khuaah a piang a, unau pianpui sawm leh pakhat neiin amah hi upa ber a ni. A pa hi Mizo History ziaktu Hrangthiauva niin a pa hian amah ngei pawh ziak leh chhiar thiam hma tura a duh avangin school a kal hmain A Aw B chhiar leh ziah a zirtir thiam vek tawh a ni. Kum ruk (6) a nihin I Kor. 13: 1- 3 thu hi tha takin a chhiar thei tawh bawk. Pu C. Chhuanvawra hian a pa zirtirna vang pawh a ni ang a, lehkha a zirna kawngah a tluan mai bakah thu leh hla lamah pawh a tui hma hle bawk a. Kum 16 a nih hian khatih hunlaia Mizorama chanchinbu awmchhun tih mai tur – Tunlai Chanchinbuah khan Letter to Editor alo chhuah ngam daih tawh mai a, a chhuanawm hle a ni. Tin, hetih hunlai vel bawk hian Kristian Hla Thar Bu, hla 275 chuanna kha an awmna lai vela an sak thiam chin hla 230 vel chu a hla number zawng zawng leh a chang indawt a lo hre vek tawh a, mihring hming hawrawp hla tlar bula tlar thlain hla alo phuah thiam der tawh bawk.
Article tak hi chu kum 1975-a Meichher-a a ziak ‘Tute nge Mizo’ tih chu a ziak hmasak ber a ni a, a hnu lamah pawh ziak chho zelin Article a ziah zawng zawng hi 540 chuang a ni tawh hial. Heng bakah hian lehkhabu hi 15 lai a ziak tawh bawk a, lehkhabu tha tak tak an ni hlawm. Tuna PU BUANGA AWARD 2022 dawng tura thlan chhuah panga zinga a tel hi a phu hle a ni.
LALZUIA COLNEY; Khuailui ral leh Turnipui avanga thangtharte pawhin kan hmelhriat em em Lalzuia Colney hi hre lo chu tlemte an ni ngei ang. Kum 1937-ah khan Farkawn khuaah alo piangin harsa tak chungin Middle School a zo a, High School pawh harsa tak chungin a zir chho leh a, Pathian zarah hlawhtling chho zelin kum 1977-ah B.A a zo a ni. Khawzawl High School-a zirtirtu hna a thawh lai hian MAL lama a thiante chuan Aizawla awm turin Minister hnenah an lo sawi a, tichuan kum 1994 atangin Aizawla Govt. K.M High School-ah thawkin kum 2006-a a pension thlengin a thawk a ni.
Pu Zuia hian Article 1000 vel a ziak tawh a, AIR-ah vawi 90 vel thu a sawi tawh bawk. Writing Competition-ah hian lawmman 28 lai a dawng tawh bawkin hengte avang hian Civil mite hnena chawimawina India sorkarin a hlan thin Padma Shri pawh kum 2010 ah khan alo dawng tawh bawk a ni. Tin, Thu leh hla avang bawk hian kum 2016-ah khan Jerusalem University chuan Doctor of Literature an lo hlan tawh bawk.
J. MALSAWMA; Thanpuia Pa tia hriat lar bawk hi Jan. 18, 1927 ah lo piangin thiamna lamah MA., LL.B a ni. Thu leh hlaa tuimi tak a nih bakah hian zirna kawngah pawh sulhnu engemawzat alo nei tawh bawk a, kum 1958 – 1962 chhungah khan Pachhunga College, Aizawlah Lecturer alo ni tawhin hetih chhung bawk hian Assam High Court ah Advocate a ni bawk a. Kum 1956 – 1962 chhung khan Mizo Sutdent Association-ah President alo ni tawh bawk a, Kum 1964 – 1965 chhung khan CYMA President alo ni tawh bawk. Heng bakah hian Sorkarah leh khawtlang lamah pawh mawhphurhna leh chanvo a ngah a, mi fel tak a ni. Tin, thu leh hla lamah pawh sulhnu tha tak tak a nei bawkin Article hi 300 vel ziak tawhin Lehkhabu hi pali a ziak tawh a, kum 1993 ah Gospel Chanchin Tha Hmar Thimpuiah tih lehkhabu a ziak a, kum 1995-ah Vanglai tih lehkhabu a ziak bawkin, Zozia tih lehkhabu pawh kum 2000-ah khan alo ziak tawh bawk.
Heng bakah hian Zo Nun tih pawh a ziak tawh bawkin hei phei chu a lehkhabu ziah hmasak ber a ni nghe nghe (Hei hi a ziah kum tak kan hre thei ta mai lo). A Article ziah – Kan Mizia tih phei chu vawiin thlenga chhiar hlawh ala niin kum 1960 January 15 daih tawha a ziak a ni nghe nghe. A mizo tawng ziahte hi chhiar a nuamin a hahdam a, mizo tawng thiam tak a nih avang hian a thuziak reng reng hi chhiar a nuam thin a ni.
PROF. R.L. THANMAWIA; A ni pawh hi a hming kan hre lar viauin a rinawm a, thu leh hla lamah phei chu a thangchhuahna ber a ni hial awm e. Kum 1954-ah khan Darlak khuaah alo piangin a pa chu Vanlalliana a ni. Mizoram University-ah Mizo Department-ah Professor leh Head of Department hna chelh tawhin kuminah khan a pension a ni. Mizo Poetry chungchanga Doctorate Degree nei/ dawng hmasa ber a ni a, hla 100 chuang a phuah tawhin lehkhabu hi 28 a ziak tawh bawk a, Article hi 400 chuang a ziak tawh bawk a ni. Hetiang thu leh hlaa sulhnu tam tak a neih avang hian kum 2012 ah khan India sorkar chuan chawimawina atan Padma Shri alo hlan tawh a, chhuanawm tak a ni.
Prof. R.L. Thanmawia lehkhabu ziah tawh thenkhatte chu; Ka thi pek che kha (1987), Hla thu hrilhfiahna (1988), Zofate Rohlu (1992), Zinkawng Raptlak Zawhtute (1994), Chuailo (1997), Zanlai Thlifim (2016), Mizo Folktales (2017) leh a dangte.
LALRAMMAWIA NGENTE; June 21, 1968-ah khan Vairengte khuaah a piang a. Thangthar zingah chuan thu leh hla ti phuisuitu ber zinga chhiar ngam a ni. Tunah hian Associate Professor niin Govt. Johnson College, Aizawlah a thawk mek a, a lehkhabu ziak RINTEI ZUNLENG tih phei chu kum 2019 khan Book of the Year atana thlan a ni nghe nghe. Tin, lehkhabu hi 28 lai a ziak tawh a, chanchinbu pawh alo enkawl tawh thin bawk.
Pu Ramtea hi mi inngaitlawm leh mi dang tana hnawksaka awm ngai lo mi a ni a, a kianga awm hi a hahdamthlak em em thin. Amah hi mi nghet cherh chawrh mi niin a thiltih reng reng hi fel fai taka ti thin mi a niin sulhnu pawr nei ngai lo kan tih ang chi hi a ni. A hmel en reng reng pawh hian tlangval sual pawh a nei lo ang tih tur hi a niin mi nun ngil tak mi a ni. Tunah hian Luangmualah a nupui HC. Lalthasangi leh a fate pathum nen an cheng mek a, thu leh hla lama chawlh nei ngai lo mi a ni. Lehkhabu ti chhuak turte hian vawi tam tak an lehkhabu hi an edit tir tawhin mizo tawng uluk mi a ni a, thangtharte tana hmahruaitu rintlak tak a ni.