Khai le, iPhone 14 series tlangzarh tum mek laiin Brazil sorkara Justice ministry chuan ramchhunga iPhones hralhchhuah a khap ta bur a, box-a charging brick dah loh vang a ni ber.
Hei bakah hian Apple company lakah fine $Maktaduai 2.3 a phut tel bawk a, sorkar lamin a ngaimawh hle a ni.
Nikum October atang tawh khan Justice Ministry hian Apple leh Samsung te chu smartphones boxes atanga charger an thun tel tawh lo leh an dah tawh loh chungchangah zawhna a zawt tawh a.
Tichuan May 2022 khan sorkar chuan Brazil rama consumer protection regulator-ah Apple leh Samsung laka fine chawi theihna tur kalpui turin a hriattir ta a ni.
Heti anga Brazil sorkarin a laka hrekna leh pawisa chawina thlenga a kalpui tak vangin tunah hian khinlet leh tumin Apple a inbuatsaih mek a, a beihlet hun tur erawh a la puangzar lo thung.