AZL: State-a rorel lai party, MNF chuan Mizoram hmun hrang hranga LC/VC by-election seat 65 neihah, seat 33 an la thei chu lawmawm an tih thu leh inthlana tling zawng zawngte an lawmpuiin duhsakna an hlan tih an sawi a. He inthlan result hian Chief Minister Zoramthanga kaihhruai MNF sorkar chu mipuiin an la rintawkzia a tilang chiang hle niin an sawi.
Congress party chuan tun tum inthlana hmun 30-a seat 50 inchuhah seat 16 an la thei leh an party thlawp independent candidate pakhat thlan tlin a ni chu result tha takah an ngai tih sawiin, party hrang hrang aiawha thlan tlinte chu duhsakna hlanin, thlan tlinte an lawmpui rualin tling zo ta lote pawh an tawrhpui thu an sawi.
ZPM pawhin seat 10 chuha Ramthar North, Champhai Dinthar, Sialhawk, Khanpui, Baktawng-ah te hnehna an chang chu lawmawm an tih thu leh candidate-te an lawmpui thu an sawi a. He LC/VC by-election a tling zawng zawngte an lawmpui a, ram leh hnam tan huaisen taka hna thawk turin duhsakna sang ber a hlan tih an sawi bawk.