India rama sahuanten ramsa inthleng tawn (animal exchange programme) an kalpui thin angin Aizawl Sahuana ramsa 15 chu Indira Gandhi Zoological Park (IGZP), Vishakapatnam-ah pek an ni.
Ramsa pek chhuahte hi zawng hmaisen (pair li), telpui (pair hnih), zo zawng (pair khat) leh savawm pakhat an ni.
September 6, 2022 khan heng ramsa la tur hian IGZP, Vishakapatnam-a thawktu mi pariatte chu Mizoramah lo thlengin an ramsa lak turte hi Aizawl Sahuan-a Range Officer hoin sahuan thawktuten lo man fel sa vekin bawm (cage)-ah an lo dah hrang fel sa a. Nimin tlai khan IGZP atanga kalte bawm (cage) kenah dah luh nghal an ni.
Ningani hian IGZP Vishakpatnam panin heng ramsate phur hian Aizawl Sahuan an chhuahsan dawn a, kawng lakah ni 10 vel thang tura beisei an ni.
IGZP-a ramsate neih zingah Aizawl Sahuana dah ve theih tur ramsa mamawh a awm ve loh avangin tun tumah hian IGZP atang hian ramsa lak luh a ni ve lo.
Nikum February khan Aizawl Sahuana ramsa 13-te hi India rama sahuan lian leh changtlung zawkte zing a mi, Nandankanan Zoological Park-ah pek chhuah an ni tawh bawk.