Higher & Technical Education Minister Dr R Lalthangliana chuan Mizoram university Southern Campus dinna turah sorkar laipuiin a tira an sawi loh, amaha inchawm tura a ti leh ta chu state sorkar tan tih ngaihna a vâng dawn tih house a hrilh.
Nimina assembly session-ah ZPM Legislature Party member C Lalsawivunga zawhna leh member dangte zawh belhna chhangin H&TE Minister Dr Thangtea chuan Ministry of Human Resource Development (MHRD)-in January 17, 2020-a Mizoram University Vice chancellor hnena MZU Southern Campus dina phal a nih thu a rawn hriattir khan university chu mahnia a inchawm tur thu sawi tel a ni lo hrim hrim tih a sawi.
Tun hnaiah mahnia inchawm an thing ri leh ta tlat mai chu buaithlak an tih thu a sawi a, “Self-finance tur chuan state sorkar tan tih ngaihna a vâng a, a har khawp mai,” a ti.
MHRD-in, ‘State sorkarin MZU Southern Campus dinna tur ram pe rawh se,’ an tih angin, ram chu an pek thu leh Land Lease Certificate pawh MZU kutah an hlan tawh thu a sawi a, building-te buatsaih a nih chhungin a bul tan nan Mizoram Engineering College building, Pukpui, Lungleia mi chu temporary-a hman tura ruahman a nih thu a sawi.
Nimin sessiona zawhna leh chhanna hun vekah ZPM Legislature Party Leader Lalduhoma’n self help group chungchanga zawhna chu chhangin Commerce & Industries changtu ni bawk, Dr Thangtea chuan Covid-19 hripui lengin eizawnna a nghawng dawm let leh inkhaichhuahna tura sorkar laipui scheme PMFME hnuaia MzSRLM hnuaiah self help group 967 an awm a, member 1,038 an inziak lut tih a sawi.
He scheme atan hian Rs. nuai 378.99 hmuh a ni a, sumte chu self help group-te hnena pek turin thla liam ta, August 29 khan MzSRLM hnenah pek a ni tih a sawi a, scheme hi zaa za central funding a nih avangin state sorkarin matching share a lo pek ve a ngai lo tih a sawi bawk a ni.