Lalnu Elizabeth II thihna chuan rimawi leh lemchan khawvel te pawh a nghawr chhuak rang hle a, British milar te bakah Hollywood star te’n sunna an sawi hlawm.
Kum 2006 a, ‘The Queen’ film lar tak hmanga Oscar award dawngtu Helen Mirren chuan Instagram-ah, “Elizabethan ka ni thei kha ka inchhuang em em a ni. Crown a tel emaw tel lova pawh Nu zahawm leh Nu inngaitlawm tak hi kan sun em em a ni,” a ti.
British music industry atangin Lalnu zahna leh sunna a richhuak hnem hle a, Sir Elton John chuan, “A bula awm ringawt pawhin thathona leh phurna nasa thlen thlentheitu,” a ti.
Sir Paul McCartney pawhin, “Pathianin Lalnu Elizabeth II malsawm se la, thlamuang takin chawl rawh se. Lalber dam reng rawh se,” a ti ve bawk.
Rolling stone band zaipui Sir Mick Jegger chuan, “Ka hun pawmpuiah khan Lalnu zahawm Elizabeth II kha a awm ve reng a. Ka naupan laiin a pasal neih programe te kha TV kaltlangin ka lo thlir a. Nula duhawm leh hmeltha tak a nihna ka la hrereng a, ram tan pawha Pi ber a ni bawk. Lal chhungkua te tawrhna ka tawrhpuiin, ka sun hle a ni,” tiin a sawi.
Hollywood supser star Sylvester Stallone (Rambo) hian, “Lalnu ropui tak, thlamuangin chawl ang che. Khawvelin amah angin a hmu leh tawh ngai lovang,” tih chu thlahna hnuhnung atan a hmang.
English singer lar Ozzy Osbourne pahwin a sun hle. “Ka ramin kan Lalnu ropui ber a sun mek lai hian kei pawhin nasa takin ka sun a. Rilru hrehawm tak chungin Lalnu Elizabeth II awm tawh lohna England ram hrehawm dan tur hi ka sawi duh,” a ti ve bawk.
Lalnu Elizbaeth II hi ningani tlai lam khan Balmoral Castle-ah thlamuang takin a chawl hlen ta a. Lal chhungkua-in online kaltlangin official-in a boral thu hi an puang.
A thih chhan dik tak hi puanzar a ni lem lova, a aiawh turin a fapa Charles chuan King Charles III hmingpu in a kaisang dawn ta a ni.