Aizawl: Central YMA chuan nimin khan Central YMA Hall, Tuikhuahtlangah ruihhlo do tura din Central Anti Drugs Squad (CADS)-a member ruat tharte lawmluhna hun a buatsaih a, he hun kaihruaitu Central YMA president R Lalngheta chuan thalai tam tak an buai mek avangin mualpho, hminghliau leh tuar pawh huamin ram leh hnam tan ruihhlo do tura hma an lak leh tak thu a sawi.
R Lalngheta chuan mualphona leh hmingchhiatna tam tak neih phah theihna ruihhlo do chu thil châkawm tak a nih loh thu sawiin, tun dinhmunah Mizoramah awlsam takin ruihhlo hmuh tur a awm a, a man pawh a tlawm a, hengte avang hian kohhran leh mipuite atangin hma la leh tura YMA an auhna a ring viau tiin, Mizoram au aw avangin ruihhlo do kawnga hma la turin CADS din a nih thu a sawi a ni.
Ruihhlo zuarte leh ruihhlo ti mekte pawh YMA member tho an nih avangin anmahni an huat loh thu sawiin, “Mihring ni lo, ruihhlo chiah do tur kan nih avangin ruihhlo laka an fihlim theihna atana kan pui dawn,” a ti.
He huna thusawitu, Central YMA Vice President Lalhmachhuana chuan Mizoramah ruihhlo a hluar a, ruihhlo ngai centre hrang hranga enkawl tur pawh an pun thu sawiin, “August 2 khan Aizawl khawpui chhunga home thenkhat kan bepawp a, ruihhlo ngawl vei enkawl ngai mi 1,871 an awm mek tih kan hre thei a, hengte bakah hian centre-a dah loh mi thahnem tak an awm bawk,” a ti.
CADS-in ruihhlo do an kalpui turah hian dan kengkawhtu police leh excise ten an uap dawn tih leh Mizoram sorkar pawhin an hmalakna chu an thlawp tih a sawi a, CADS member ruat tharte pawh fuihin, ruihhlo an dona kawngah mualphona an hmachhawn loh nana fimkhur tur te, ram leh hnam chhan nana inpe an nihna te hre fo turin a chah.
CADS member ruat tharte lawm luhna hunah hian Mizoram Police-a DIG Lalbiakthanga Khiangte, Aizawl SP C.Lalruaia leh Excise & Narcotics Commissioner Ngurchungnunga ten thu an sawi bawk a, ruihhlo do kawngah hian dan anga chet a pawimawhzia leh dan hriatna kawngah rilru leh ngaihtuahna seng deuh deuh turin CADS member-te an chah a, tih tur leh tih loh tur thliar thiam a tulzia an sawi bawk.
CADS member tur hian Aizawl khawpui chhunga Branch YMA 100 chuang atangin pakhat theuh branch tinin an ruat a, 1st Batch-ah hian member 54 an awm ang a, thla hnih (Sept & Oct) chhung atan ruat an ni.