- Lalhminghlua Nkb
Khawvela ruang hmasa ber kha ruang chhiarsen lohin a zui mek zel e! He leia lal ropui ber pawl Queen Elizabeth-i pawhin zui vein a liam ve ta. Lalnu kha mipui hmaah bawp khawkherha thut loh tur niin, a tan khan Driving licence neih a tul ve lova, ramdanga zin turin Passport/Visa a mamawh ve hek lo. A damchhung khan Prime Minister sawm panga zet a thawhpui hman a, amaherawh chu an ram inthlanah vote a thlak ve ngai lo. Kum 70 chhung zet lal thuthlengah a thu a, a ropui khawp mai. Ani kha ropui viau mahse kum 100 a dam tling bik tlat lo. Hringnun dam chhung hi a va rei lo em! A damrei pawl pawhin kum 100 an tling meuh lo a ni. Thlamuang takin Lalnu-ropuii chu chawl mawlh teh se.
United Kingdom-ah chuan an lalnu hi an ngaisang nasa hle. Mizoram pawh hi Bristish hnuaiah kum 57 chhung zet kan lo awm ve tawh a. Mizorama lal ban a nih hma daih khan a ni chu lalnu a ni tawh a, an ram mipuiin ban an duh ve lo. Keini Mizoram ah chuan kum 1946-ah Mizorama political party hmasa ber Mizo Union party a ding a, an thupui ber lal ban a ni nghal. Kum 1954-ah lal kan ban ta, tichuan tun thleng mai hian Mizoram politics hi a la chingchivet a nih hi. Party hmasa ber Mizo Union au hla leh phurpui kha a fuh tawk lo deuh a ni maithei. Insuihkhawm aia tute emaw, tlawm taka an dinhmun pheh hniam tumna khan inngeih lohna leh inlungrual lohna Mizo zingah a hring chhuak ta niin a lang. Nu leh pa, pi leh pute thei thur eiah an tu leh fate kan ha a la tim zel mai em ni ang?
KC Lalvunga (Zikpuii pa) chuan Mizo Union chungchang hetiang hian a sawi, “Chutia Aizawl khawpui thinlung phira inthen chu India ram Independence chuan a rawn nang a. Kum 1947 August 15 lawm nan Mizo Union chuan ropui takin kawng zawh an tum a, Kulikawn Khawlaiah an inhawt buk a. Chutih lai chuan Independence duhho Zalen Pawl (United Mizo Freedom Organization) khan Dawrpui Veng biak inah mittui nen Sap haw tur an lo thlah a; chu tak chu Mizo union-in va chil an tum a ni a. Anni an lo inhawr khawm, chumi nia Aizawl khawpui chu meibu hem tan ang ut mai a ni a, a tek han awm se chuan ri phut mai tur, bal heu ho mai tur kan ni a. Mahse lehlam lehlam upa thluak nemin an tlangvalte an nem dai a, chumi tum chuan thisen chhuak lovin buaina chu kan pumpelh thei hram a. Amaherawh chu khata tanga rilru kal phir leh thil inertawn kha zawi zawiin a kal zel a, chumi rilru chu eng engah emaw a inlar zel a; a tawpah, thil tha lo takah min hruai lut ta a ni,” tiin a sawi.
Mizo Union hi Lal ban duh leh India a luh duh pawl an ni. L. Keivoma chuan Mizo Union chungchang hetiang hian a sawi, “Anni ho khukpui ber chu lal ban leh Assam Assembly hnuaia inhui buk tum a ni,” tiin a sawi. United Mizo Freedom Organization (UMFO/Zalen Pawl) hi kum 1947-a din niin Mizoram zalenna duh pawl an ni, Mizo lal leh lehkhathiamte chu UMFO-ah hian an tel ber.