Ukrainian sipaite chuan tun hnaia Ukraine khawchhak lama beihpui an thlak tharnaah sq km 3,000 chuanga zau an la tih an sawi.
An insawi dan hi a nih tak tak chuan Kyiv sipaite hian darkar 48 lek chhungin a let thuma zau ram an la hman tihna a ni.
Ningani tlai khan President Zelensky chuan sq km 1,000-a zau an lak thu leh Inrinniah sq km 2,000-a zau an lak tawh thu a sawi.
Inrinni khan khawchhak lamah hian Ukrainian sipaite hian Russian-ten an luah lai, Izyum leh Kupiansk khua an lut.
UK defence thuneitute chuan khaw pawnah inbeihna a la awm zel tih an sawi a. Kyiv-a thuneitute pawhin Ukrainian sipaite hian beih chhunzawmin Izyum chhehvel hmun tam tak an la tih an sawi.
Russian defence ministry pawhin an sipaite chu Izyum leh Kupiansk atanga an tawlh kir thu an sawi a, an sipaite hi Moscow-in a thlawp inlak hran tum pawlte thunun lai hmunah an inhawr khawm tha leh dawn tih an sawi.
Russian ministry hian Balaklyia khua atang pawhin an sipaite an inhnuh kir thu an sawi bawk a, hei hi Donetsk lama nasa zawka an tan theih nana an tih niin an sawi a. Ukrainian sipaite chu he khawpuiah hian Zirtawpni atang khan an lut tan a ni.
Hetih lai hian Kharkiv region-a Russia-in rorel tura a dahte chuan mipuite chu Russia-ah ‘an nunna hum nan’ insaseng turin a hriattir ve mek.
Social media-a video thehdarhah pawh ramri kânna laiah thui tak an intlar a. Russia lama ramri bula Belgorod region Governor Vyacheslav Gladkov chuan mi sang chuangin an ram an lut tawh tih a sawi.
Gladkov-a hian Inrinni khan Russia rama lutte tan hian mobile catering, intihlumna leh damdawi an lo dahsak thu a sawi bawk.
Russian-te an tawlh kir a ngaih chungchangah hian Chechen hruaitu, President Vladimir Putin-a lamtang, Ramzan Kadyrov chu a lawm lo hle.
Telegram-a thu a chhuahah Kadyrov chuan Russian chet dan chu hetiang a nih zel chuan an ram hruaituten an insawi fiah ngei a phut tih atar lang.
Tawlh kir nual tawh mah se Russian-te hian Ukraine ram hmun ngaa thena hmun khat chu an la luah tho va, mi thenkhat chuan an indona chu zawi zawiin a tawp hnai niin an ngai a. Kadyrov chuan ‘Russia an chak dawn’ nia sawiin, ‘Nato ralthuam tihchhiat a ni ang’ a ti bawk.
Kupiansk hi Russia-in khawchhak lama châk lak nana an hmanpui ber niin Izyum hi indona a chhuah tirha Moscow-in thla khat chuang lak tuma an bei niin an chet dan rawng avanga President Putin-a pawhin sawisel a hlawh phahna kha a ni.