Ukrainian-ten an ram lak zat an sawi hi a tak a nih chuan Russian-ten April thlaa Kyiv leh a chhehvel an chhuahsan hnuah indona kal meka an hnungtawlh nasat ber tum a ni ang.
Indona lama mi thiam pakhat chuan tun hi Indona II-na hnua Russian unit-in an hmun an hloh hmasak ber a nih thu a sawi.
Ukraine sipaiten an hmuh hloh tawh an la let leh hi Kyiv tana thu lawmawm a nih chhan pakhat chu khawthlang ramte hnenah nasa zawka ralthuama puihna an nawr theihna remchang a ni thei.
Foreign Minister Dmytro Kuleba chuan tun hnaia an chetna chuan an sipaite hian khawthlang ramte ralthuam tam zawk hmangin indona chu hma taka titawp thei an nihzia a lantir niin a sawi.
Ukraine hian kar hmasa tir lamah khan khawchhak lamah hian beihpui an thlak thar a, hei hi ram dangten chhim lama Kherson vela hma an sawn nia an sawi luih luih lai a ni.
Mi thiamte chuan Russia hian Kherson khawpui venghim tur hian nasa zawka an thawh an ring.
Khawchhak lama Ukraine-in hma an sawn lai hian chhim lamah pawh hma an sawn tho niin an insawi.
Hetih lai hian Russian sipaite hi chhim lamah hian an inveng nasa a, Ukrainian sipaite hi an lo bei let nasa hle.
Hetih lai hian Ukraine-a energy regulator, Energoatom chuan Russian-te thunun lai, Zaporizhzhia nuclear power plant chu tithiin electric siamtir rih a ni lo tih a sawi a. Reactor hian ama hman tur power siam nan ni thum a mamawh a, hei vang hian pawn lama pek chhuah tur siam chu tihtawp a ni tih a sawi.