British lalnu thi ta, Queen kuang chu Pathianni zing thleng khan a thihna hmun, Balmoral-ah a la awm a, karleh Thawhtanni hian ram chawimawina famkim nen an ram khawpui berah vui turin ruahmanna siam a ni a. Vui a nih hma hian ro a relsak thin an ram mipuiten a ruang chu Palace of Holyroodhouse leh Westminster Hall-ah zahna leh thlahna hnuhnung an hlanna hun remchang hawnsak an ni dawn a, mipuiin an lalnu an sun leh an thlah mek lai hian a aiawha lal ni ta, King Charles III chuan UK hnuaia ram pali awmte a tlawh kual ang a, heng ramah te hian a nu an sunna hunte a hmanpui dawn a ni.
September 11
(Pathianni)
Queen Elizabeth II hi Ningania a thih hnuah khan oak-a siam kuangah dah niin Balmoral Castle-a lâmna pindan (ballroom)-ah dah a ni a, Pathianni khan phurh chhuah a ni.
Balmoral hi an ram sanaa chawhma dar 10:00-ah phurh chhuah niin km 280 chuanga hla, Edinburgh panpui a ni a, darkar ruk chhung zet kawngpui zawhpui a ni.
Edinburg panna kawngah hian khawpui lian tak tak – Aberdeen, Dundee leh Perth te pawh an kal pel.
Scottish khawpuiah hian Bristish lalte chenna in pakhat, Palace of Holyroodhouse-ah luhpui a ni a, Throne Room an tihah zalh a ni.
Hetih lai hian London khawpuiah chuan King Charles III chuan Buckingham Palace-ah Commonwealth Secretary General a lo kawm ve mek a. Hemi hnuah hian palace-ah vek hian Bow Room-ah ram hotu lu ber a nihna ram palai, High Commissioner-te a kawm leh bawk.
September 12
(Thawhtanni)
King hian Westminster Hall a tlawh ang a, Parliament in hniha member-ten lalnu an sunna hun a hmanpui ang.
Camilla, Queen Consort nen King hi Edinburgh panin thlawhnain an kal zui ang a. Hei hi Operation Spring Tide tia an sawi, United Kingdom hnuaia ram palite a tlawhna tur bul tanna a ni dawn a, lal a nih hnuah a tlawh hmasak berna tur a ni ang.
Chawhnuah Queen kuang chu St Giles’ Cathedral panpui a ni dawn a, hei hi King leh Royal Family-a member dangte pawhin an zui ang.
Queen ruang hi St Giles’-ah vantlangin an tlawh leh en theih tura dah a ni dawn a, hei hi darkar 24 chhung awh tur a ni.
King hi Palace of Holyroodhouse-ah kir lehin Scotland-a First Minister Nicola Sturgeon nen mipui hmaah an inlan ang a. Queen Consort nen Scottish Parliament-ah member-ten an sunna hun an hmanpui zui dawn bawk.
Zan lamah King Charles hian St Giles’ Cathedral pan lehin Royal Family langsar zualte nen hun an hmang leh dawn a ni.
September 13
(Thawhlehni)
Princess Royal, Princess Anne, Queen fanu neih chhun chuan Queen kuang hi St Giles’ Cathedral atanga zui chhuakin Edinburgh thlawhna tumhmun an panpui ang a, thlawhnain RAF Northolt an pan zui ang.
Queen hian a tawp nan Scotland chhuahsanin London a pan ang a, an ram sanaa zan dar 7:00 vela an thlen beisei a ni.
Thlawhna tumhmun atang hian Buckingham Palace panpui a ni ang a. Kuang hi lal inah hian King leh Camilla, Queen Consort chuan lo dawngsawngin Bow Room-ah dah zui a ni ang.
Lalnu ruang a lo thlen hma hian King leh Camilla hian Northern Ireland-a Belfast an lo tlawh hmasa dawn a. Hillsborough Castle pan zuiin Queen leh Northern Ireland ram inkungkaih dan tar lanna (exhibition) huaihawt an tlawh dawn a ni.
King hian Northern Ireland Secretary of State Chris Heaton-Harris MP bakah party hruaitu dangte a hmu bawk ang a. Northern Ireland Assembly Speaker Alex Maskey MLA-a kaihhruaia Queen sunna hun buatsaih a hmanpui bawk ang.
Northern Ireland-ah hian sakhaw hruaitute pawh a hmuh hnuah King Charles leh Camilla chu St Anne’s Cathedral-a tawngtai inkhawmah telin London an pan zui dawn a ni.
September 14
(Nilaini)
Queen ruang chu Buckingham Palace atangin chawhnu dar 2:00-ah vantlang hmuh theih turin Westminster Hall panpui a ni ang.
A kuang hi laipui hnuktu tawlailir hmanga phurh a ni ang a, hei hi King’s Troop Royal Horse Artillery ta a ni a, sipai kalrem lâm a awm ang a, Royal Family-in an zui bawk ang.
Lalnu kuang hi King Charles chuan zuiin Royal Standard-a khuh a ni ang.
Lalnu kuangin Westminster Hall a pan lai hi mipuiin an thlir thei dawn a. Queen’s Gardens, The Mall, Horse Guards & Horse Guards Arch, Whitehall, Parliament Street, Parliament Square leh New Palace Yard zawng zawng a kal pel dawn a ni.
Kea kawng an zawh hi minute 40 vel ni tura ngaih a ni a. Kawng an zawh hi London khawpuia Royal Parks-a television screen lian tak tak dahah pawh tihchhuah tum a ni.
Westminster Hall-ah hian dawhsan bik an siam, catafalque an tihah Queen chu zalh a ni ang a, a chungah Imperial State Crown, orb leh sceptre dah a ni bawk ang.
Kuang hi nileng zankhuain Royal Household-a unit-ten a kil tinah an veng tlat dawn a ni.
Queen kuang bulah hian Archbishop of Canterbury Justin Welby hovin King Charles leh Royal Family member te nen hun tawi tê an hmang ang a, hemi hnuah hian vantlang hmuh theih turin Hall hi hawn zui a ni dawn a ni.
September 15
(Ningani)
Queen ruang hi vui a nih hma Westminster Hall-a dah a nih ni khatna a intan dawn a. A kuang khuh phui tlat hi dawhsana dah a ni ang a, mipuite a bulah kalin zahna an hlan thei ang.
Mipuiin an tlawh theih dan tur kimchang hi puan a la ni lo va; mahse, kum zabi 11-na laia sak tawh in, Palace of Westminster zinga in upa ber leh British sorkar laimu ni bawkah hian dah a nih chhungin mi sang tam takin an tlawh hman rin a ni.
Mipuiin an ram hruaitu leh lalte hetianga zahna an hlan hun hawn hi an tih fo thin a ni a; mahse, kum 1965-a Winston Churchill-a hnuah khan hetianga tih hu an la awm leh miah lo thung.
September 16
(Zirtawpni)
Queen kuang chu a ni hnih nan Westminster Hall-ah dah chhunzawm a ni dawn a, mipui pawhin zahna hnuhnung an hlan zel bawk ang.
King leh Camilla erawh Wales-ah an zin ang a, lal ni chunga United Kingdom lalram hnuaia ram pali awm a tlawh hnuhnung ber a ni tawh ang.
September 17
(Inrinni)
A ni thum nan Queen kuang chu Westminster Hall-ah dah chhunzawm a ni ang.
September 18
(Pathianni)
A ni li nan Queen kuang chu Westminster Hall-ah dah chhunzawm a ni ang.
September 19
(Thawhtanni)
Zingah mipuiin Queen zahna an hlan theihna hun a tawp ang a, Westminster Abbey-ah ram chawimawina famkim nena vui turin lak a ni ang a, he ni UK-ah chuan bank chawlh atan puan a ni.
Vuina inkhawmah hian lalnu chhung leh khatte bakah UK-a politician hlun leh ram hrang hranga hotu liante tel tura ngaih a ni.
Vui a nih zawhah lalnu ruang chu Westminster Abbey atangin Wellington Arch panpui a ni ang a, Windsor an panpui leh bawk ang.
Windsor Chapel-a St George’s Chapel-ah phurh luh a ni ang a, hetah hian a tawp nan tak tak hun hmanpui a ni dawn a ni.