Social Welfare Minister Dr. K. Beichhua chuan Inrinni khan Ngopa-ah Eklavya Model Residential School leh Tribal Youth Development Centre a hawng.
Hawnna inkhawmah Minister Dr. K. Beichhua chuan, Ngopa leh a chhehvel khua atangin mithiam thahnem tak, Mizoram tana tangkai tak tak an chhuak nasa tawh tih sawiin, an hnungzui turin zirlaite’n theihna an neih thu a sawi a. “Kan mithiam hmasate kha harsa tak takin lehkha an zir a, nangni chu vawiinah a thlawn vekin lehkha in zir thei dawn a, in vannei hle a ni,” a ti.
Dr K Beichhua chuan, “EMRS Ngopa chu department ta ni lo in, a viltu chauh kan ni,” a ti a, a neitu dik tak chu Ngopa leh a chhehvel khuate an nih avangin school chu mahni ta anga enkawl a, zirtirtute nena thawhhona tha tak nei zel turin a chah.
Khualzahawm L Thangmawia, MLA, SEDP Human Resources Development Board Vice chairman pawhin thu sawiin, EMRS Ngopa din a nih theihna atan sulsutu Minister hlui H. Rohluna te, PL Thanga te leh Social Welfare department-a hmalatu te chungah lawmthu a sawi.
L Thangmawia chuan zirlaite fuihin, hlawhtling ngei tura bei tur leh hlawhchham avanga chhuanlam siam lo in, hlawhtlinga history siam zawk turin a chah nghal bawk.
EMRS Ngopa hi Ministry of Tribal Affairs atanga cheng vaibelchhe 1598 senga sak a, kum thum chhunga sak zawh tura ruahman a nih laiin, November 2019 khan sak zawh a ni a. Kum hnih leh thla riat chhungin an sak zawh a ni.
EMRS Ngopa hi kum 2021 khan function tan tir niin, tun academic session-ah hian zirlai 270 leh thawktu 19 an awm mek a ni.