Hmeichhe tennis a world number one ni lai Iga Swiatek-i tan kum tha a ni a. Kumina a Grand Slam title pahnihna la turin Inrinni zan US Open final-ah a chak.
Kum 21 mi Polish nula hian final-ah a khungpui seeded number 5, Tunisian mi tunhnaia hmasawn tak mai Ons Jabeur chu 6-2 7-6 (7-5) in a hneh a. A Grand Slam title pathumna a la.
Flushing Meadows-ah kum 28 mi Jabeur hian chiang taka set hmasa zawk a hloh hnuah set hnihnaah fakawm takin a bei let a. Mahse Swiatek a dang zo lo.
July thla khan Wimbledon final-ah a lo tlawm tawh a. Tennis Grand Slam title a la nghah leh hlek a ngai. Hetihlai hian Swiatek hi French Open a lak hnuah kuminah a champion leh a ni.
Final a intum te hi kumin WTA Tour a player che tha ber pahnihte an ni a, mahse final inkhelah erawh Swiatek-i leh midang zawng inkar a zau tih a lang.
Thiam leh tlo inkawp
Kumin March thla a world number one Ashleigh Barty a chawlh hnuah Swiatek hian eltu mumal nei lovin WTA Tour-ah ro a rel a. A chet that em avangin a awmna a sang fal.
Kuminah a zawna match 37 chak neiin tournament parukah a champion zawn thei.
Tun nipuiah Wimbledon a a tlak hnuah a tlahniam deuh angin an sawi a, mahse New York-ah a theihna sang tak a lantir leh a. Round hmasa lamah chak chho zel mahse tun tournament a a khelh that ber tum final atan a khek.
WTA Tour a final a hnehna a chan tum 9 ah set hloh miah lovin a chak vek a. Tun tumah erawh set khatnaah a thiamzia a lang.
Set hnihna erawh a dan a dang. A khingpui in a nawr na a, break point vawi hnih a neih a hman tangkai theih loh hnuah a talbuai teuh.
Mahse hun pawimawh erawh a insiamtha a, point pawimawh vaw chhuak tu zawka tang zel thei turin rilru fim a nei a. Tihsual a nei duh miah lo.
US Open a ball zang zawk an hman chu a ngainat loh thu lo sawi tawh Swiatek chuan, “Champion duh mah ila a tir atangin ka rilruah ka dah duh lo. Tournament tan hma lam ka tan a awlsam vek lova, inbuatsaih uluk ka ngai hle.” a ti a.
“Ka beisei loh thil nimahse ka champion hi ka lawm a, he title hi ka chhuang hle. US Open phei chu ball a chak em avangin a awlsam lova, hei vang hian ka champion thei ang em tih hi ka inhre bik lo. Mahse he hlawhtlinna hian ka hma lamah ka tan thil tam tak a thleng thei tih a nemnghet.” tiin a sawi bawk.