Tata Yodha 4×4 LPS Pro Fight semifinal neih hun tura ruahman chu Boxrec-a ziah luh tur a nih avangin an sawn hla.
R Dengthuama Indoor Stadium-ah September 23 leh 24 chhungin semifinal neih tura tih chu sawn tlai hretin September 24 leh 26-ah te semi-final inhnek a thleng ang.
Chiang zawkin
Khawvel puma professional boxing ziah luhna Boxrec-ah inhnek turte ni thum chhung tal tar chhuah hman a ngai. Hei vang hian semifinal neih hun hi chawlh a tam zawk theih nan sawn hlat a ni a. September 19, 20 leh 21-ah ruahman sa angin quarterfinal inhnek buatsaih a ni dawn a, September 30 zanah final a ni ang.
Pro Fight weight panga atangin flyweight leh bantamweight-ah second round khelh mek a ni a, featherweight-ah third round an zo hnai tawh a, lightweight leh welterweight-ah round of 16 khelh mek a ni ve thung.
September 13, thawhlehni zanah chhunzawm a ni dawn a, a hmuna en tur tan ticket Rs 50-a lei a ngai tawh dawn. A tir zan 10 chhungin man chawi lovin a hmunah a duh apiang tan en theih a ni.
AwP-a’n Australian boxer tha tum dawn
India super lightweight number one Vanlalawmpuia chuan Zirtawpni zan khan awlsam takin Thuamrodinga (Ramthar) a hneh a, quarterfinal a lut.
Khuangthing boxer hi Australia-ah a fehchhuak zui nghal a, September 15 khian Nissan Arena, Nathan-ah Ty Telford nen an inhnek ang.
Kum 25 mi Awpa’n professional huangah vawi nga khel tawhin tlawm nei lovin tum li a chak a, zin kawng a zawh mekah chona hautak ber tur a ni tih a sawi.
Amah aia inches hnih a sang, Australian kum 24 mi Telford hi feet nga leh inchi 10-a sang niin vawi sarih a chak tawh a, tum khat inhnehtawkin vawi khat a tlawm tawh.
Telford nen Australia-a an inhnek zawh hnuah Awpa’n Pro Fight quarterfinal a khelh chhunzawm leh nghal dawn a, LT Mawia (New Champhai) nen September 20-ah semifinal luh inchuhin an inhnek dawn.