ILO-in report a tihchhuah tharah hian sal anga awmna chhan thil tam tak tar lan a ni a, heng zingah hian thil pathum – ram thenkhatah tharum thawhna thleng tam lutuk, hripui leng leh sik leh sa inthlak nasa lutuk chu a langsar hle.
Covid-19 khan mi tam tak sum lak luhna a titawp a, mi tam takin leiba an neih phah a, hei hi mi tam tak chu hna thawh luihtirnaah a hnuk luta ngaih a ni a. ILO chuan hripui leng khan kum 20 chhunga khawvela ‘rethei uchuak an tam ber hun’ a thlen niin an sawi.
Indona leh ralthuam cheleka helna chuan sala awmna a hring nasa hle bawk niin tar lan a ni a. Hmun thenkhatah chuan naupangte chu sipai anga chhawr an ni thin.
Sik leh sa inthlak nasain mi a nghawng nasa hle bawk niin ILO report-ah hian tar lan a ni a. Miin an chenna hmuna sik leh sain a zir tawh loh avangin loh theih lohvin an pem a, an tan eibar zawnna a harsat zui thn avangin mi hnuaia kun mai ngaih theihna chance a sang ta thin hle nia ngaih a ni.
Eng nge modern slavery?
Contemporary slavery, leh neo-slavery tia sawi bawk, ‘modern slavery’ hi sawi fiah dan a inang lo va. ILO chuan hna thawh luihtir (forced labour), mipat hmeichhiatna hmanpui atana inhman (forced sexual exploitation) leh sorkarin hna a thawh luihtir bakah nupui pasal inneih luihtir a huamtir a. Thenkhat chuan heng hi modern slavery-ah an pawm vek lo va, belh an nei bawk.