AZL: Hmeichhe naupangte mahnia inven dan zirtirna tura thawhhona thuthlung chu nimin khan Samagra Shiksha leh Mizoram Amateur Taekwondo Association(MATA) ten an ziak.
School Education Complex Conference Hall, Macdonald Hill-ah Rani Laxmibai Atma Raksha Prashishan, hmeichhe naupangte mahnia inven dan zirtirna tur thawhhona thuthlung an ziak a. Samagra Shiksha aiawhin C. Lalthanzira, Additional State Project Director-in hming a ziak a, MATA aiawhin Joseph Thansanga, General Secretary, MATA-in hming a ziak thung.
Thawhhona thuthlung ziahah hian Samagra Shiksha hnuai sikul zawng zawnga hmeichhe naupangten mahni inven dan an thiam theih nan leh inrintawkna an neih theih nan MATA-in zirtirna an kalpui ang a. District hrang hranga sorkar sikul zawng zawng elementary leh secondary, a vaiin school 1,263-te chu tuam vek an ni ang.
Zirtirtu tur chu MATA-ten an ruat ang a, he zirtirna hi thla thum chhunga zawh tura ruahman a ni.