Aizawl: ‘Zuk leh hmuam laka zirlaite venhim’ tih thupui hmangin nimin khan Vanapa Hall, Aizawl-ah State Anti-Tobacco Day hman a ni a. Health & Family Welfare Board Vice Chairman Dr ZR Thiamsanga’n a hmanpui.
National Tobacco Control Programme, National Health Mission leh Indian Society on Tobacco & Health, Mizoram buatsaih State Anti-Tobacco Day hmannaah hian H&FW Board vice chairman chuan zuk leh hmuam ti nasate zingah Mizoram hming a la lang reng chu vanduaithlak a tih thu sawiin, hemi kawnga hmasawn a tul thu a sawi.
Dr ZR Thiamsanga chuan, “Zuk leh hmuam hi hriselna tichhetu a nih zia hriat thar fo va, inthiarfihlimsan a pawimawh,” a ti a. Zuk leh hmuam avanga nau pai hrisel loh phah theih dan te, nau chhiat theih a nih thu te, nau sawngnawi neih phah theihna hial a nih thu te a sawi a. Zuk leh hmuam tel lova awm theih a nihzia leh zuk leh hmuam chu tul lova sum tam tak khawhralna a nih thu sawiin, kalkhawmte chu zuk leh hmuam laka fihlim turin a sawm.
National Health Mission, Mission Director Dr Eric Zomawia’n zuk leh hmuam laka zirlaite venhim chungchang a sawi a. Zuk leh hmuam that lohzia inzirtir a pawimawh thu te, zuk leh hmuam nghawng tha lo awm thei te, zuk leh hmuam do kawnga hmalakna kal mek te a sawi bawk.