Mizoram State Commission for Women (MSCW) chuan Hortoki nu, Zoramthari thihna chungchang thubuai a ngaihtuahah nau chunga thihna emaw, thawktute dawngdahna emaw puh tluk mai theih tur an hmu lo.
MSCW chuan Civil Hospital, Aizawla nau nei tura a awm laia boral, Zoramthari thihna chungchanga thubuai an ziah luh chu nimin khan ngaihtuahin, Hospital & Medical Education-a Director-in thihna thlen dan leh hemi chungchanga an chhui zuina report a thehluh chu an thlir ho.
Report an dawn an thlir ho atanga an hmuh chinah chuan he thihna thlen chhan ber hre tura post mortem examination tih a ni ta lo chu pawi an ti a, thuneitu lamten lungphu chawl ni theia an ngaih chu finfiahna tha a awm lo nachungin thil ni ve thei niin an hria.
Zoramthari thihna chhan ber chu finfiahna a awm tak si loh avangin tuna information an neih ang atanga an thlir chuan nau chunga thihna emaw, thawktute dawngdahna emawa han puh tluk mai theih tur niin Commission for Women chuan a ngai lo a; amaherawhchu, thuneitu lamten thil tihsual palh a awm nia lang thei tura hnuhma thar hmuh chhuah an nei a nih chuan theihtawp chhuaha thil dik lo titu lakah thununna lek kawh chhunzawm a nih theih nan hma la ngei turin thuneitute an beisei zui a ni.
Nau nei tura damdawi in pantu, Zoramthari thihna chhan tak chu eng pawh lo ni se, a beisei ang ngaihsakna chu a dawng chiah lo niin commission chuan ngai bawk.
Hospital & Medical Education-a Director-in report a theh luha Civil Hospital, Aizawla nau neihna room-ah thawktute nasa taka an indaih loh thu a tar lan chu MSCW chuan a ngai thu tak hle tih thubuai an ngaihtuahna chungchang order an tihchhuahah an tar lang.
Hemi avang hian Health & Family Welfare Department principal director chu order copy a dawn atanga ni 30 chhunga Mizoram puma sorkar enkawl damdawi in leh mi mal enkawl damdawi in zawng zawnga nau neihna ward/labour room dinhmun kimchang women commission-ah ziaka pe turin a hriattir.
Hemi bakah hian nau neihna ward/labour room-a tun dinhmuna damdawi ina khum neih mek zat leh doctor leh nurse duty neih zat kimchang leh chu damdawi in-in January, 2022 atanga tun, September, 2022 thlenga an damdawi ina nau piang zat leh nau chunga thihna thleng zat chiang taka ziak theh lut turin a hriattir bawk.