Aizawl : Mizoram Assembly Session hnuhnung bera bill pawm tak, ‘The Mizoram (Land Revenue) Amendment Bill, 2022 chu mipui chanvo atanga chanai neih ve tumna dan (law) niin ZPM Leader Lalduhoma’n a sawi.
Thawhtannia ZPM chhung inkhawm neihah Lalduhoma hian, The Mizoram (Land Revenue) Amendment Bill, 2022 pawm tak chu Mizoram sorkarin mi mal pawisa hman sak a tumna dan a ni tih sawiin, “A huatthlala a, a diklo hrim hrim a. Hetiang dan tha lo tak siamtu chu Congress an ni a, a hmangtu leh a aia nasa lehzuala dahngheh tumtu chu MNF nia sawiin, he’ng party pahnihte hian mipui min hmangaih lo a, mipui hmakhua an ngai lo a ni,” a ti.
Lalduhoma hian tuna bill pawm taka section 75(A) tih loh a dang zawng chu ZPM in an pawm vek tih sawiin, an duh loh ber erawh ram neitu ni ve uk si lo politician te, official te, zangnadawmna dawng tura an inrawlh ve thin hi a ni tih sawi a. Dikna kengkawhtu tura ngaih ram hruaitute zangnadawmna dawnna tur lam apianga kal a, Revenue Minister hoa hetianga an thuneihna hmanga ram neitu ni lo te’n an dawn ve theihna tur kawng an zawng thin chu an hua tih a sawi.
The Mizoram (Land Revenue) Amendment Bill, 2022 chu central sorkar siam sa an entawn mai a nih thu sawiin, “Kha dan pass a niha a that turzia, LSC nei lo pawhin property card te an nei thei tawh dawn a, loan te an la thei tawh dawn a ni, tih te pawh kha a tha. MNF sorkar siam anga an sawi erawh pawi ka ti,” Lalduhoma’n a ti.
ZPM leader hian Lunglei Lunglawna PWD ram land lease thi tawh tihnun tumin Revenue office-ah buaipui mek laiin, Lunglawn pa pakhatin a mi mal ram atan a dil chu Revenue Minister hian a sawipui tih sawiin, ram chu PWD an chhuhsak dawn nge PWD tan an pe dawn tih pawh a hriat tawh loh niin a sawi bawk.
ZPM Adviser Paul Thangzika kaihhruai inkhawmah hian ZPM President Lalliansawta’n mi thar a lawm lut a ni.