F1 chanchin a tlankawng tlanchak theihna ber a chhal, motorsport chanchin a hmun ropui zinga an dah Autodromo Nazionale di Monza-ah world champion ni lai Red Bull Racing car khalhtu Dutch driver hian Pathianni zan Italian Grand Prix-ah pakhatna a hauh.
Tun thla tawp a Singapore a intlansiak neih turah midang result a zirin world champion a ni chiang thei tawh dawn.
Verstappen hian a elpui ber Ferrari car khalhtu Charles Leclerc lakah point 116 in hma a hruai tawh. Tun season intlansiak 22 an tlan tur atanga 16 an tlannaah hian vawi 11-na atan hnehna a chang. Hei chauh hi a ni lo – pakhatna a la hauh ngai lohna hmun ‘Temple of Speed’ tia hminglem an vuah, Ferrari ho ‘home race’ ah dawhsan sang ber a luah.
Ferrari car khalhtu Leclerc-a’n pahnihna a hauh a. Intlansiakah a hmasa ber atangin tlan chhuak tan mahse ani aia tlanchak thei zawk tak Verstappen chu a tan hneh theih a ni lo. Mercedes car khalhtu George Russell chu pathumna a ni thung.
Tun tum intlansiak tawp dan in sawi a hlawh. McLaren car intlansiak tawp dawnah a chhiat avangin lakchhuah a ngai. Hei vang hian safety car tirh luh niin intlansiak a khaihlak. Mahse car an la chhuak thuai leh thei si lova, hei vang hian intlansiak thuneitu lamin intlansiak tan leh tawh lovin safety car kaihhruaina hnuaiah lap tlan tur la awmte an tlan zawh tir.
An tlanchak em a ni!
World champion ni lai in tun dinhmun a F1 car tha ber a khalh a, dan theih a ni lo tih tunhnai intlansiak hnuhnung panga atangin a lang chiang.
Hungary-ah 10-na atangin pakhatna a hauh a, Belgium-ah power unit thar a hman avangin hremna hmu in 14-na atang tlan tan tir a ni chungin a chak tho.
Monza-ah pawh hian power unit part thar a hman avangin ‘five-place grid penalty’ pek a ni a. Qualifying-ah pahnihna a nih avangin pasarihna atangin a tlan tan.
Intlansiak an tan hnuin lap khat an tlan zawh meuh chuan palinaah a chho hman. Lap li an tlan zawhin pathumnaah a awm tawh
Lap 6-naah George Russell pelin a elpui Leclerc a um tan. Ferrari car hi tlan chak mahse Red Bull car an tluk loh avangin an ven a ngai tih an hria.
Italian team in ‘risk’ an la, lap 12-naah Sebastian Vettel-a Aston Martin a chhiat avangin ‘virtual safety car’ puan a ni a, hetih chhung hian car ke an thlak. Pitstop pangngaiah second 25 vel tal team ten an seng tura ngaih a nihlaiin safety car laia an inthlak fel hman chuan second 16 vel chiah an hloh tura chhut a ni.
Intlansiak tan leh niin tyre thar nen pawh Verstappen an tluk thei meuh lo. Lap 33-naah Ferrari in Leclerc ko lut lehin tyre tlanchakpui theih ber, a nem ber an vuahtir. Awmzia erawh a awm thui chuang lo.
Kumin Red Bull car hi kawng ngil a tlan chak thei ber ni mahse Monza-ah kual thui tak tak a tam avangin kual a tlanchak thei tak Ferrari car mil tura ngaih a ni. Red Bull pawhin ‘high downforce’ setup an hmanphah a, mahse heti chung hian a ngil a an top speed a tlahniam tam lo.
Tin, season tan tir lama an car rit lutuk ti zang tura ‘in-season development’ a team hrang hrang an inelnaah hma an sawn bik em avangin tun dinhmunah tu team mahin an car an el tak tak thei lo.
“Kan pha ngang lo”
Hnehna changtu Verstappen chuan intlansiak zawhah, “Tun kartawpah car tha tak kan nei, tyre eng pawh hmang ila kan tlanchak ber thei zel. Car in tyre a hmang ral chak em em lo bawk a, chuvangin kan dinhmun a tha hle.”
“A tawpah kha chuan Charles nena kan inkar kha uluk taka ven bak ka tih a ngai lo. Safety car a lo chhuah a ngai a, han intlansiak zo thei ila duhthusam nimahse kan tan ni tha tak a ni.” a ti.
Hmun thenkhatah safety car in Ferrari tana ‘chance’ tha ni tur a dal nia ngaihna a lian hle a. Mahse Leclerc chuan, “A tawp a kan intlansiak leh thei lo kha a ngeiawm viau, pahnihna a kan awm lai a nih miau avangin tih theih a tam lo. Mahse a pumpuiah kan theihtawp kan chhuah a, chak turin a tawk lo. An car a chak em avangin kan pha ngang rih lo a ni.” a ti.
Champion rim a nam
Verstappen hian October ni 2 a tlan tur Singapore intlansiak an tlan zawh hunah point 138 a hma a hruai theih chuan a champion chiang tawh dawn. Hemi tur hian pakhatna a nih a ngai a, Leclerc-a’n point a hmuh miah loh a ngai dawn thung.
A tan pakhatna nih a beiseiawm rualin Singapore tlankawng hi Ferrari chetthatna thin a ni a. Kuminah pawh an car ziarang nen inmil leh tura ngaih a ni.
Midang result
Tun kartawp intlansiakah driver pakua in ‘grid penalty’ an hmu a, car part phal chin bak a thar an hman avangin a hnung lam atangin intlansiak an tan.
19-na leh 18-na atanga tlan tan Mercedes driver, vawi sarih world champion ni tawh Lewis Hamilton leh Ferrari car khalhtu pakhat zawk Carlos Sainz ten pangana leh palina an hauh.
British driver Hamilton-a’n intlansiak bul tan tha lo mahse a tawp a khar tha. A car tyre a enkawl thiam an chhawr.
Spanish driver Sainz a tlanchak thei hle a, a tawp safety car thleng lo se George Russell a lehpelh mai a beiseiawm hman hle.
Dutch driver pakhatin hnehna a chan ni ah Dutch driver dang in fak a hlawh. Williams driver Alexander Albon rilphir zai avanga thlaktu Nyck de Vries chuan Formula 1 intlansiak a hmachhawn hmasak berah 9-na a hauh.
Kum 27 mi Mercedes reserve driver hi an engine hmangtu Williams in tun kartawp atan an hawh. Williams hi car 10 awm zinga point la hmu tlem ber an ni a, tunhnaiah erawh hma sawnin kawng ngilah an tlanchak.
De Vries hian he theihna tak hi a hmang tangkai hle a. Qualifying-ah session hnihna a kaipui thei a, pariatna atang bul a tan theih phah. Season thar a F1 a tel nghet thei tura sawi zinga tel hi fans-ten Driver of the Day-ah an thlang.