- HC Vanlalruata
Ruihhlo tawlhruk hluar zual ta leh tualchhunga ruihhlo a tam tak avangin Central YMA chuan Ruihhlo dotu tur pawl, Central Anti Drugs Squad (CADS) a din thar leh ta a. Chanchinthar lamin an tarlan dan chuan “CADS Batch hmasa ber te chu Zirtawpni (Sept. 9) khan Central YMA Hall-ah lak luh an ni a. Kum engemaw zat hnu a CYMA in ruihhlo do tu pawl a din thar leh CADS member tur hian Aizawl khawpui chhunga Branch YMA 100 chuang atangin member pakhat theuh Branch tinin an ruat a, Batch hmasa ber te hi thla hnih September leh October thla chhung atan ruat an ni.
“Central YMA President Pu R.Lalngheta chuan mualpho na leh hmingchhiatna tam tak neih phah theihna Ruihhlo Do chu thil chakawm tak ni lo mahse ram leh hnam dam na’n leh ruihhlo laka ţhalai tam tak an buai mek avangin mualpho hminghliau leh tuarte pawh huamin ram leh hnam tan CYMA thutlukna kalpui a nih thu a sawi a. Ruihhlo zuar leh a ti mek te pawh YMA member tho an nih avangin anmahni an huat loh thu a sawi a, ruihhlo chauh Do tur an nih thu a sawi a, ruihhlo laka an fihlim theih nan an puih tur thu a sawi a ni.”
A ţul tihna-in a ur thluk miau hi chuan eng do pawl bik emaw han din rup hi inkhap hleihtheih pawh a ni bik chiah lova. Keini Mizote phei chu a huhova dan kengkawhtu nihna inpe chawp (community policing) a kal ching kan ni a. Hei hi kan sorkar hrawn tawh zawng zawng chak loh vang leh, dan an kenkawh ţhat ngam loh vang a ni ber mai. Ram hruaitute lahin ram leh mipui hruai ngam lovin pawl lian leh mihring ngahte rawn duk an ching deuh vek mai bawk si a, hei bak hi beisei tihsan ngam chi pawh a ni lo.
Ruihhlo dona atan hian India Parliament-in dan khauh tak mai a siam a, chu chu Narcotic Drugs & Psychotropic Substances Act, 1985 hi a ni a. The Prevention of Illicit Trafficking in Narcotic Drugs and Psychotropic Substances Act, 1988 kha a hmasa ai hian a hremna a na zawk em em mai a, a taka hman zui erawh a ni ta meuh lo. ND&PS Act, 1985 pawh hi dan khauh tak mai a ni a, mahni hman tur ruihhlo tlemte mansak tih loh, hralh tham mansakte chu kum 10 aia tlem lo tannin-a tan theihna leh pawisa tam tham tak chawitir theihna a ni.
He dan hian ruihhlo man thei tur Police leh state Excise & Narcotics department officer bakah sorkar laipui hnuaia thawkte pawh an dinhmun a zirin fel takin a ziak vek a. Chutiang ni lovin an lo man (arrest) ve a, ruihhlo an mansak (seize) chuan harsatna a awm ngei ngei thin tih hi chiang taka hriat a ngai a ni. ND & PS-in ruihhlo leh a kengtu/neitute man thei tura thuneihna a pekte pawhin an pawngpaw man ngawt chuan a ho dêr thei a. A mantu sorkar mi ni lo, an manna veng/khua a khawtlang hruaitu emaw, tlawmngai pawl hruaitu emaw leh mi langsar (prominent citizen) kha thuhretu-ah an hmang ţhin a ni.
Dan hmanlai hi khauh viau mahse, tihdan phung (procedure) pensan deuhva thiltih a nih chuan ruihhlo zuar/kawltu kha court-ah awlsam takin a chhuak thei mai ţhin tih hi hriat a pawimawh hle. Chutiang chu court ţawngkamah chuan ‘procedural lapse’ an ti a ni awm e. Kan ţhahnemngaih luatah hian dan bawhchhetu kan chhuah zalen hlauh thei tihte hi hriat a ngai a. Chumi ngaihtuah reng chung chuan CADS hi an kal a ngai ngei ang. Ruihhlo kan do dawn a nih chuan dan tlawhchhanin kan do a ngai tlat si a.
A mantu tura danin thuneihna a pekte’n man lova, mahni a dan lo kengkawh ve ringawttute’n dan kalphung ni lova an lo man hian ruihhlo tawlhtu leh kawltute dan hmanga hrem kawngah harsatna a siam a. Court-ah an thubuai a chak lo ţhin. Chuvangin khua leh tui zawng zawngin chanvo leh mawhphurhna kan neih, mi thiltisual kan hmuh/hriat a, thuneitute lo thlen hma a lo chelh khawtlai (detain) leh a rang thei ang bera thuneitute hriattir hi a pawimawh hle a ni.
CADS leh a zawmpui pengte hian ruihhlo tawlh an hriat apiang thuneitu (Excise leh Police) te hrilh zel sel a, thuneitute nen an thawhho ţhat phawt chuan ruihhlo do hna hi awmze nei zawkin a thawh theih dawn a. Ruihhlo tawlh/kawlte pawh dan angin na zawka hrem theih an ni ang. Anmahni’n dan an kenkawh erawh chuan an pal sual rem rum leh pal hang a, YMA zahawmna leh ngainatawmna an tichhe thei tih hre reng se la a ţha khawp mai.
Chu bakah chuan ruihhlo mante hi CADS emaw tlawmngai pawl hian kawl lovin, thuneitute hnenah a bo a bang awm lovin hlan vek se la. Anni’n dan ang thlapin court-a a sample an thehluh leh endik tura an thawn tih loh chu him takin an lo kawl ang a. Thubuai a tawp hnu a tihral hunah pawh dan ang thlapin an tiral (dispose) ang. Chuti lova hmun him lova an dah avanga bo ţhinte hi a pawi hle a. Tunhma a SRS-in an ruihhlo man an dahna, ruihhlo ngaite’n emaw an lo rawk ţhin ang kha thleng tawh lo sela. ND&PS Act, 1985 section 52A in tihdan tur a sawi ang thlapa tihral ngei hi a him bawk a ni.
A bik takin Mizo ţhalaite hi ruihhlo hian a suat nasa em em mai a, namen lovin chhungkua leh khawtlang a tibuai bawk a. A hma lama nachhawkna an hmansual thin spasmo proxyvon leh parvon spa kha India ramah an siam chhuak tawh lova. Chuti chung chuan damdawi ţangkai tak tak hmangsual a ruih tur an dap leh bakah heroin a hluar leh nasa mai bawk. Hetiang a nih avang hian Central YMA-in ruihhlo do pawl din leh turin thutlukna a siam ta a ni a. Hmana SRS a tel mi ţhenkhat chetdan kha bansanin rilru tharin sorkara ND&PS dan kengkawhtute nen thawhho ţhat a pawimawh ta hle.
CYMA president-in a sawi dan ang tak hian ruihhlo ngaite’n an sim theihna turte hi ngaih pawimawh a, ruihhlo tawlh ţhinte pawh dan anga hrem an nih ngei theihna tura ţan lak a hun tawh a ni. Dan rorelna ngai pawimawhin mahni kuta dan lek bansan a ţul a. Chumi hawi zawng leh thawhhona ţha nei chungin ruihhlo do kawnga thathawhtu zawng zawng an ţanrual chuan Mizoram a ruihhlo lut tur tam tak kan dang thei ang a. Ruihhlo khawih an tlem phawt chuan a lo lut pawh a tlem chho ngei ang.
Thil reng reng hi a hmangtu an tam chuan hman tur a awm zel mai a. Zu pawh kan khap bur chungin a in duh tan chuan lei tur a awm leh mai zel ang tho hi a ni. Kan ţhalai zingah ruihhlo khawih an tlém chuan a tawlhruk lam pawh a tlem ve thawkhat mai dawn a. Mi nunna lak theihna leh nun tihchhiat vek theihna ruihhlo tawlhtute na taka dan hmanga hrem an nih ngei theihna atan ţan i la thar leh ila, dan bawhchhe lovin, dan hmangin ruihhlo i do ang u.