Aizawl : Union Commerce and Industry Minister Piyush Goyal hova New Delhi-ah Bo- ard of Trade meeting nimina neihah Commerce & Industries Minister Dr R. Lalthangliana telin, Commerce & Industries lama Mizoram sorkar hmalakna leh pawimawh dangte a sawi.
Dr R. Lalthangliana chuan Mizoram sik leh sa chu lum lutuk lo leh vawt lutuk lo a nih avangin thlai leh thei thar kawngah Mizoramin hma hun eng tak a neih thu sawiin, “a bikin Agriculture, Horticulture leh Food processing lamah nasa takin hma kan sawnin kan thang thei a ni” a ti a. Thei chi hrang hrang – Sapthei, Serthlum, Hatkora, Balhla, Dragon fruit leh a dangte bakah thlai – Sawhthing, Aieng leh Hmarcha leh a dang te, pangpar lamah – Anthurium leh Rose leh a dang ten Mizoram leilung an ngeih avangin tun aia nasa lehzuala chin a hlawk dawn niin a sawi.
Thlai leh thei thar chhuah te sawngbawl zui (post-harvest management) na tur hmanrua leh bungraw tha erawh Mizoramin a neih that tawk loh thu Dr R Lalthangliana chuan sawiin, sorkar laipuiin ngaihpawimawhsak ngei se a duh thu a sawi bawk.
Dr R Lalthangliana chuan Mizoramin Organic farming a kalpui dan pawh sawiin, sorkar laipuiin ruahmanna fel tak a neih theih chuan Mizoram tharchhuahte chu ram changkang zawk, a bikin organic farming ngaihsanna Europe leh America-ah hlawkna hmuh theih a nih tur thu a sawi a. Agriculture industry dawta Mizoram mipuite hmalakna lian ber chu Handloom, Textiles leh Handicrafts a nih thu pawh sawiin, hemi kawngah hian nasa lehzuala sorkar laipuiin hma a lakpuia ruahmanna a siampui chuan thalaite tan eizawnna ngelnghet tam tak a siam dawn bak ah India sorkar pawhin hlawkna a tel ngei theihna tur a nih thu sawiin, a tihhmasawn kawnga hma laksak turin sorkar laipui chu a ngen nghal.
Mizoramah changtlung zawka Mau sawngbawl a hlawk dan tur te, Silk thar chhuah kawnga Mizoram dinhmun leh hmasawn theih dan tur te sawiin, India ramin Bangladesh leh Myanmar nen insumdawntawnna changtlung zawk a neih theihna tura sorkar laipui hnena Bangladesh ramri – Silsuri, Tuipuibari, Marpara leh Nunsuri-a border haat sa tura a ngen thu leh pilot project atan Mizoram sor- karin Silsuri – Sajek a vauchher thu leh Bangladesh sorkar ngaihchan mek a nih thu te bakah Commerce & Industries kaihhnawih pawimawh dang te Dr R Lalthangliana chuan a sawi bawk.