Lunglei district AIDS prevention & control committee chu nimin khan an chairman, Lunglei Bawrhsap Kulothungan hovin an thukhawm a, he thutkhawmah hian kuminah Lunglei district-ah HIV kai thar 138 hmuh chhuah a nih thu tarlan a ni.
He thutkhawma an tarlan danin, kumin January atanga August thleng khan Lunglei district chhungah mi 5267 te thisen endik niin, HIV kai thar hmuh chhuah 138 an awm a. Tun dinhmunah Lunglei District-ah antiretroviral therapy (ART) regular a la mek mi 1046 an awm mek bawk.
Bawrhsap hova thukhawm chuan Lunglei district AIDS prevention & control committee hmalakna tur tul hrang hrangte pawh ngaihtuah hovin, Sub Hqrs YMA nen tangkawpa ruihhlo do kawnga hmalak leh School Education department leh College Principal-te nen tangkawpa Lunglei district-a zirna in ah te HIV/ AIDS awareness campaign neih te an rel.
MSACS nen tangkawpa zau zawka mipui zirtirna information, education & co- mmunication kawnga hmalak te an rel bakah committee member lakluh belh an remti a, MSACS leh CYMA tangkawp HIV/AIDS do kawnga hmalakna ‘Zoram harh rawh campaign’ kalpui tura Lunglei district-a hmalak dan turte an rel bawk a ni.
Thutkhawm kaihruaitu Lunglei bawrhsap Kulothungan chuan Mizoram chu HIV/ AIDS hluarna ber state a ni chu pawi a tih thu leh HIV/AIDS do kawngah mitin ten mawhphurna an nei theuh tih a sawi.
Tunhnaiah Lunglei district-ah ruihhlova inchiu avanga thalai HIV kai thar engem- awzat an awm pawh veiawm a tih thu sawiin, School education department leh College principal-te nen tawngkawpin Lunglei district-a zirna in ah te HIV/AIDS awareness campaign nei thuai tura hmalak nghal a nih tur thu Bawrhsap chuan a sawi bawk a ni.